» செய்திகள் - விளையாட்டு » இந்தியா

தீபிகா படுகோனேவுக்கு கொலை மிரட்டல்... அரியானா முதல்வரிடம் கர்நாடக முதல்வர் கோரிக்கை!!

செவ்வாய் 21, நவம்பர் 2017 12:16:55 PM (IST)

நடிகை தீபிகா படுகோனேவுக்கு கொலை மிரட்டல் விடுத்தவர்கள்  மீது நடவடிக்கை எடுக்குமாறு அரியானா முதல்வருக்கு சித்தராமையா கோரிக்கை விடுத்துள்ளார்.

‘பத்மாவதி’ இந்தி திரைப்படத்தில் நடிகை தீபிகா படுகோனே கதாநாயகியாக நடித்துள்ளார். அந்த படத்தில் ராஜபுத்ர சமூகத்தை சேர்ந்த 13-வது நூற்றாண்டின் சித்தூர்கர் ராணி பத்மாவதியின் வாழ்க்கை குறித்த கதை இடம் பெற்றுள்ளது. ராணியின் புகழுக்கு களங்கம் ஏற்படுத்தும் விதமாக அந்த படத்தில் காட்சிகள் அமைந்துள்ளதாக கூறி ராஜ்புத் சமூகத்தை சேர்ந்தவர்கள் நாடு முழுவதும் கடும் எதிர்ப்பு தெரிவித்து போராட்டம் நடத்தி வருகிறார்கள்.

அந்த படத்தில் நடித்துள்ள நடிகை தீபிகா படுகோனேவுக்கு கொலை மிரட்டல் விடுக்கப்பட்டுள்ளது. இந்நிலையில் அரியானா மாநிலத்தை சேர்ந்த பா.ஜனதா பிரமுகர், தீபிகா படுகோனேவின் தலைக்கு ரூ.10 கோடி பரிசை அறிவித்துள்ளார். இந்த நிலையில் இதுகுறித்து அரியானா மாநில முதல்வர் மனோகர்லால் கட்டாரிடம் கர்நாடக முதல்வர் சித்தராமையா பேசினார். 

இதுகுறித்து சித்தராமையா தனது டுவிட்டர் பக்கத்தில் வெளியிட்டுள்ள பதிவில் கூறி இருப்பதாவது: ‘பத்மாவதி’ இந்தி படத்தில் நடித்துள்ள நடிகை தீபிகா படுகோனேவுக்கு கொலை மிரட்டல் விடுக்கப்பட்டுள்ளது. பா.ஜனதாவின் வெறுப்பு கலாசாரத்தை நான் கண்டிக்கிறேன். தீபிகா படுகோனே உலக அளவில் புகழ் பெற்ற நடிகை. அவருக்கு ஆதரவாக கர்நாடக அரசு நிற்கிறது. நான் அரியானா முதல்வரிடம் பேசினேன்.

அவருக்கு மிரட்டல் விடுத்தவர்கள் மீது நடவடிக்கை எடுக்குமாறு கூறியுள்ளேன். தீபிகா படுகோனே கர்நாடகத்தை சேர்ந்தவர். அவர் கர்நாடகம் வரும்போது அவருக்கும், அவரது குடும்பத்தினருக்கும் தேவையான பாதுகாப்பு வழங்கப்படும். இவ்வாறு சித்தராமையா கூறினார். முன்னதாக மின்சாரத்துறை அமைச்சர் டி.கே.சிவக்குமார் கூறுகையில், "நடிகை தீபிகா படுகோனேவின் தலைக்கு ரூ.10 கோடி பரிசு என்று அரியானா பா.ஜனதா நிர்வாகி ஒருவர் கூறி இருக்கிறார். இது கண்டிக்கத்தக்கது ஆகும். இது தான் பா.ஜனதாவின் கலாசாரமா?. ஒரு பிரபல விளையாட்டு வீரரின் மகளுக்கு பா.ஜனதா வழங்கும் மரியாதை இது தானா?. பெண்களுக்கு உரிய மரியாதையை கொடுங்கள்.

தீபிகா படுகோனேவுக்கு மிரட்டல் விடுத்தவர்கள் மீது உடனே நடவடிக்கை எடுக்க வேண்டும். பா.ஜனதா இதற்காக மன்னிப்பு கேட்க வேண்டும். அரசியல் சாசனம் கொடுத்துள்ள கருத்து சுதந்திரத்தை பாதுகாக்க இந்தியர்கள் குறிப்பாக பெண்கள், கலையுலகினர் அனைவரும் சேர்ந்து குரல் கொடுக்க வேண்டும்” என்றார். போலீஸ் அமைச்சர் ராமலிங்கரெட்டி கூறுகையில், "நடிகை தீபிகா படுகோனே கர்நாடகத்திற்கு வரும்போது உரிய பாதுகாப்பு வழங்கப்படும். அவருடைய குடும்பத்தினருக்கும் பாதுகாப்பு வழங்கப்படும்” என்றார். 


மக்கள் கருத்து


மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.



மேலும் தொடரும் செய்திகள்

Temporary Advts

Sponsored Ads




Tirunelveli Business Directory