» செய்திகள் - விளையாட்டு » இந்தியா

சிறு வியாபாரிகளுக்கு மாதம் ரூ.3 ஆயிரம் பென்சன் ‍: மத்திய அமைச்சரவை ஒப்புதல்

சனி 1, ஜூன் 2019 12:44:58 PM (IST)

சிறு வியாபாரிகளுக்கு மாதம் ரூ.3 ஆயிரம் ஓய்வூதியம் அளிக்கும் திட்டத்துக்கு மத்திய  அமைச்சரவை நேற்று  ஒப்புதல் அளித்துள்ளது. 

பிரதமர் மோடி தலைமையிலான மத்திய அமைச்சரவை நேற்று முன்தினம் பதவி ஏற்றது. பிரதமருடன் 24 காபினெட் அமைச்சர்களும், தனிப்பொறுப்புடன் கூடிய இணை அமைச்சர்கள் 9 பேரும், இணை அமைச்சர்கள் 24 பேரும் பதவி ஏற்றனர். புதிய அமைச்சர்களுக்கு நேற்று மதியம் இலாகா ஒதுக்கீடு செய்து அறிவிக்கப்பட்டது. இதைத் தொடர்ந்து நேற்று மாலை பிரதமர் மோடி தலைமையில் புதிய அமைச்சரவையின் முதல் கூட்டம் நடைபெற்றது.

கூட்டத்தில் விவசாயிகள், சிறு வியாபாரிகள் பயன் பெறும் வகையில் புதிய முடிவுகள் எடுக்கப்பட்டன. தேர்தலை முன்னிட்டு கடந்த பிப்ரவரி மாதம் தாக்கல் செய்யப்பட்ட இடைக்கால பட்ஜெட்டில் விவசாயிகளுக்கு ஆண்டுக்கு ரூ.6 ஆயிரம் உதவித்தொகை வழங்கும் திட்டம் அறிவிக்கப்பட்டது. அந்த திட்டத்தின் கீழ் ஏழை விவசாயிகளுக்கு 3 தவணைகளில் தலா ரூ.2 ஆயிரம் வீதம் வழங்கப்படும் என்று கூறப்பட்டது. அதன்படி கடந்த பிப்ரவரி மாதம் நாடு முழுவதும் உள்ள ஏழை விவசாயிகளுக்கு தலா ரூ.2 ஆயிரம் வீதம் வழங்கப்பட்டது. 12 கோடி விவசாயிகள் இந்த திட்டத்தால் பயன் அடைந்தனர்.

நேற்று நடந்த மத்திய அமைச்சரவை கூட்டத்தில் இதுபற்றி ஆய்வு செய்யப்பட்டது. ஆண்டுக்கு ரூ.6 ஆயிரம் நிதி உதவி வழங்கும் திட்டத்தை நாட்டில் உள்ள அனைத்து விவசாயிகளுக்கும் விரிவுபடுத்த கூட்டத்தில் ஒப்புதல் வழங்கப்பட்டது. இதன் மூலம் கூடுதலாக 2 கோடி விவசாயிகள், அதாவது 15 கோடி விவசாயிகள் பயன் பெறுவார்கள். விவசாயிகளுக்கு வழங்கப்படும் ஓய்வூதிய திட்டத்தில் கூடுதலாக நிறைய பேர் பயன்பெற கூட்டத்தில் புதிய முடிவுகள் எடுக்கப்பட்டன. அதன்படி விவசாயிகளுக்கான புதிய ஓய்வூதிய திட்டம் ரூ.10,774 கோடியில் செயல்படுத்தப்படும். சிறு விவசாயிகளுக்கு புதிய ஓய்வூதிய திட்டத்தின்படி மாதம் ரூ.3 ஆயிரம் கிடைக்கும். மொத்தத்தில் விவசாயிகள் ஓய்வூதிய திட்டத்தில் 5 கோடி சிறு மற்றும் குறு விவசாயிகள் பயன்பெறுவார்கள்.

ஓய்வூதிய திட்டத்துக்கு பதிவு செய்த விவசாயி திடீரென மரணம் அடைந்து விட்டால் அவரது மனைவி 50 சதவீத ஓய்வூதியத்தை பெற முடியும். பிரதான் மந்திரி கிசான் பென்சன் யோஜனா என்ற இந்த திட்டத்தில் சிறு மற்றும் விளிம்பு நிலை விவசாயிகள் தானாக முன் வந்து இந்த ஓய்வூதிய திட்டத்தில் சேர்ந்து கொள்ளலாம் என்று அறிவிக்கப்பட்டுள்ளது. விவசாயிகளுக்கான புதிய திட்டங்கள் குறித்து மத்திய விவசாயத்துறை அமைச்சர் நரேந்திரசிங் தோமர் கூறியதாவது: விவசாயிகள் அனைவரும் ஓய்வூதிய திட்டத்தில் சேரலாம். விவசாயிகள் எவ்வளவு தொகை செலுத்துகிறார்களோ, அதே அளவுக்கான தொகையை அரசும் அவர்கள் கணக்கில் செலுத்தும். இவ்வாறு அவர் கூறினார்.

கிராமப்புற பொருளாதாரத்தை சரி செய்யவும், மொத்த உள்நாட்டு உற்பத்தியில் வளர்ச்சியை மேம்படுத்தவும் விவசாயிகளுக்கான அறிவிப்புகளை மத்திய அரசு வெளியிட்டுள்ளது. இது நாட்டின் மொத்த பொருளாதார வளர்ச்சிக்கு கை கொடுக்கும் என்று கூறப்படுகிறது. விவசாயிகள் போன்று சிறு வியாபாரிகளுக்கும் ஓய்வூதியம் அளிக்கும் திட்டத்துக்கு நேற்று அமைச்சரவை ஒப்புதல் அளித்துள்ளது. இந்த திட்டத்துக்கு முதலில் ரூ.75 ஆயிரம் கோடி செலவாகும் என்று எதிர்பார்க்கப்பட்டது. ஆனால் நேற்று அமைச்சரவையில் இந்த திட்டத்துக்கு புதிய அம்சங்கள் சேர்க்கப்பட்டதால் 2019-2020ம் நிதியாண்டில் மத்திய அரசுக்கு ரூ.87,217 கோடி செலவாகும் என்று தெரிகிறது.

இந்த திட்டத்தின் கீழ் கடைக்காரர்கள், சில்லரை வியாபாரிகள், சுய தொழில் செய்பவர்கள் பயன் பெறலாம். ஜி.எஸ்.டி.யில் ஆண்டுக்கு ரூ.1½ கோடிக்கு கீழ் வரவு-செலவு கணக்கு தாக்கல் செய்துள்ள வியாபாரிகள்தான் இந்த திட்டத்தில் பயன் பெற முடியும். அந்த பட்டியலில் உள்ள 18 வயது முதல் 40 வயது வரை உள்ள வியாபாரிகள் இந்த திட்டத்தில் தங்கள் பெயர்களை பதிவு செய்து கொள்ளலாம் என்று அறிவிக்கப்பட்டுள்ளது.

அப்படி பதிவு செய்த சிறு வியாபாரிகளுக்கு அவர்களது 60 வயதுக்கு பிறகு மாதம் தோறும் ரூ.3 ஆயிரம் ஓய்வூதியம் கிடைக்கும். நாடு முழுவதும் 3 கோடி சில்லரை வியாபாரிகள் இந்த திட்டத்தின்படி பயன் பெறுவார்கள். அடுத்த 3 ஆண்டுகளில் இந்த ஓய்வூதிய திட்டத்தில் 5 கோடி சில்லரை வியாபாரிகள் சேர வாய்ப்பு இருப்பதாக மத்திய மந்திரி பிரகாஷ் ஜவடேகர் தெரிவித்தார். சிறு வியாபாரிகள் தங்கள் ஓய்வூதிய திட்டத்தில் எந்த அளவுக்கு பணம் செலுத்துகிறார்களோ, அதே அளவு தொகையை மத்திய அரசும் செலுத்தும் என்பது குறிப்பிடத்தக்கது.


மக்கள் கருத்து


மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.



மேலும் தொடரும் செய்திகள்

Sponsored Ads

Sterlite Industries (I) Ltd




Tirunelveli Business Directory