குஜராத்தில் கனமழை வெள்ளம்: 3பேர் பலி; மக்களின் இயல்பு வாழ்க்கை பாதிப்பு!

குஜராத்தில் கடந்த 2 நாட்களாக பெய்து வரும் கனமழையால் 3பேர் உயிரிழந்தனர். மக்களின் இயல்பு வாழ்க்கை பாதிக்கப்பட்டுள்ளது. 

வடமேற்கு மத்தியப் பிரதேசம் மற்றும் அதனை ஒட்டிய கிழக்கு ராஜஸ்தான் பகுதியில் நிலவும் ஆழ்ந்த காற்றழுத்த தாழ்வு நிலை காரணமாக மத்தியப் பிரதேசம், ராஜஸ்தான், குஜராத், மராட்டியம் ஆகிய மாநிலங்களில் கனமழை பெய்யும் என்று வானிலை ஆய்வு மையம் எச்சரிக்கை விடுத்து இருந்தது. இதன்படி, குஜராத்தில் கடந்த 2 நாட்களாக கனமழை பெய்து வருகிறது. 

கனமழை காரணமாக பல்வேறு மாவட்டங்கள் வெள்ளக்காடானது. குறிப்பாக மோர்பி மாவட்டத்தில் பல பகுதிகள் வெள்ளத்தில் மிதக்கின்றன. மழை வெள்ளத்தால் இதுவரை 3பேர் உயிரிழந்துள்ளதாக தகவல் வெளியாகி உள்ளது. தாழ்வான பகுதிகளில் வசித்த மக்கள் பாதுகாப்பான இடத்தில் தங்க வைக்கப்பட்டனர். கனமழை காரணாமாக குஜராத்தின் நீர்நிலைகள் நிரம்பியுள்ளது. சர்தார் சரோவர் நர்மதா அணையின் நீர்மட்டம் 135.30 மீட்டராக உயர்ந்துள்ளது.