அசாதாரண சூழ்நிலையில் தூத்துக்குடிக்கு ஆளுனர் வருகை : பேராசிரியை பாத்திமாபாபு குற்றச்சாட்டு

தூத்துக்குடியில் அசாதாரண சூழல் நிலவுகின்ற போது இன்று வரும் தமிழக ஆளுனரிடம் மனு கொடுத்து என்ன பயன் கிடைத்து விட போகிறது என பேராசிரியை பாத்திமா பாபு கேள்வி எழுப்பியுள்ளார்.

பொதுமக்களிடம் மனுக்கள் பெற இன்று தூத்துக்குடிக்கு தமிழக ஆளுனர் பன்வாரிலால் புரோஹித் வருகை தர உள்ளார். இந்நிலையில் ஸ்டெர்லைட் எதிர்ப்பு மக்கள் இயக்கம் சார்பில் செய்தியாளர்களை சந்தித்த ஓய்வு பெற்ற பேராசிரியை பாத்திமா பாபு கூறும் போது, கடந்த மே 22 ம் தேதிக்கு பிறகு தூத்துக்குடியில் அசாதாரண சூழல் நிலவுகிறது. மக்கள் கொந்தளிப்பில் உள்ளனர். துப்பாக்கிசூட்டில் காயமடைந்தவர்களின் வாழ்வாதாரத்திற்கு எந்த வழிவகையும் செய்யப்படவில்லை தூத்துக்குடி துப்பாக்கி சூட்டிற்கு பிரதமர் மோடி இதுவரை எந்த ஒரு கண்டனமும் ஆறுதலும் தெரிவிக்கவில்லை.

அப்படிப்பட்ட சூழலில் அவரது பிரதிநிதியாக உள்ள தமிழக ஆளுனர் பன்வாரிலால் புரோஹித் பொதுமக்களிடம் மனு பெற தூத்துக்குடி வர உள்ளார். அவர் இந்த காகிதங்களை பெற்று என்ன செய்து விட போகிறார்?. எனவே அவரிடம் ஸ்டெர்லைட் தொடர்பான மனுக்களை அளித்து எந்த பிரயோஜனமும் இல்லை. தூத்துக்குடி மக்களும் தங்கள் எதிர்ப்பை பதிவு செய்யும் வகையில் ஆளுனர் சந்திப்பை புறக்கணிக்க வேண்டும் என்றார். பேட்டியின் போது வழக்கறிஞர் அதிசயகுமார், தெர்மல் ராஜா உட்பட பலர் உடனிருந்தனர்.