மத ரீதியாக செயல்படும் இன்ஸ்பெக்டர், விஏஓ மீது நடவடிக்கை: எஸ்.பி.,யிடம் மூதாட்டி புகார்

மத ரீதியாக செயல்படுவதாக போலீஸ் இன்ஸ்பெக்டர், வி.ஏ.ஓ.,மீது தென்காசி மாவட்ட எஸ்பியிடம் மூதாட்டி ஒருவர் புகார் அளித்துள்ளார். 

தென்காசி மாவட்டம் கடையம்  அருகேயுள்ள பூவனுமாரைச் சேர்ந்தவர் ராமசாமி மனைவி பொன்னம்மாள் (வயது 72). இவர் இந்துமுன்னணி பிரமுகர்களுடன் வந்து தென்காசி மாவட்ட காவல் கண்காணிப்பாளரிடம் புகார் மனு ஒன்று கொடுத்தார். அம்மனுவில் பூவனூரில் ஆக்ரமிப்புகள் அகற்றுவது தொடர்பாக இந்து முன்னணி பொறுப்பாளர் பரமசிவன் அதிகாரிகளுக்கு புகார் மனு அனுப்பியுள்ளார். குறிப்பிட்ட பிரிவினர் ஆக்ரமிப்புகளை அகற்றாமல் மற்றொரு பிரிவினரின் ஆக்ரமிப்புகளை மட்டும் அகற்றப்பட்டது. இது தொடர்பாக கேள்வி கேட்டதற்கு எனது மகன் செல்லத்துரை மீது கடையம் போலீசார் வழக்கு பதிவு செய்து அவரை கைது செய்துள்ளனர்.

மேலும் எனது வீட்டில் கட்டியிருந்த இந்துமுன்னணி கொடியை இன்ஸ்பெக்டர் மிரட்டி அகற்ற கூறிவிட்டார். என்னையும் மிரட்டினார். அப்போது கிராம நிர்வாக அலுவலர் இல்லை. ஆனால் கிராம நிர்வாக அலுவலர் மூலம் புகார் பெற்று போலீசார் என் மகன் மீதும், எனது பேரன்; மீதும் வழக்கு பதிவு செய்துள்ளனர். மத ரீதியாக செயல்படும் அதிகாரிகள் மீது துறை ரீதியாக நடவடிக்கை எடுக்க வேண்டும் என புகார் மனுவில் பொன்னம்மாள் கூறியுள்ளார்.