ஓட்டலை சூறையாடிய சம்பவத்தில் வாலிபர் கைது

நாங்குநேரி அருகே ஓட்டலை சூறையாடிய சம்பவத்தில் வாலிபரை போலீசார் கைது செய்தனர்.

நெல்லை மாவட்டம், வள்ளியூரைச் சேர்ந்தவர் அந்தோணி அல்போன்ஸ் விஜய் (45). இவர் நாங்குநேரி அருகே வாகைக்குளம் நாற்கர சாலையோரம் தொழில்நுட்ப பூங்கா எதிரில் ஓட்டல் நடத்தி வருகிறார். சம்பவத்தன்று இவரது ஓட்டலில் சாப்பிட்டவர்களிடம் பணம் கேட்டபோது தகராறு செய்தனர். 

இரவில் இவர் ஓட்டலை பூட்டி விட்டு சென்ற பின்னர், தகராறு செய்த அந்த கும்பல், ஓட்டலின் கண்ணாடிகளை உடைத்து உள்ளே நுழைந்து பொருட்களை சூறையாடியது. இதுபற்றிய புகாரின் பேரில் நாங்குநேரி போலீசார் வழக்குப்பதிவு செய்து மர்மநபர்களை தேடி வந்தனர். இந்த நிலையில் இச்சம்பவம் தொடர்பாக தென்னிமலையைச் சேர்ந்த அருணாசலம் (28) என்பவரை போலீசார் நேற்று கைது செய்தனர். தொடர்ந்து மேலும் பல நபர்களை போலீசார் தேடி வருகின்றனர்.