பாவூர்சத்திரத்தில் ரூ.4.5 கோடியில் ரயில்வே மேம்பாலம்: டெண்டர் அறிவிப்பு

பாவூர்சத்திரத்தில் ரூ.4.5 கோடி செலவில் ரயில்வே மேம்பாலம் கட்ட டெண்டர் வெளியிடப்பட்டுள்ளது.

திருநெல்வேலி-தென்காசி இடையே நான்கு வழிச்சாலை அமைக்கப்பட்டு வருகிறது. இச்சாலையில் தென்காசி மாவட்டம் பாவூர்சத்திரத்தில் ரயில்வே கிராசிங் உள்ளது. இச்சாலையில் எப்போதும் அதிகமான வாகனங்கள் சென்று வருகின்றன. கேரளாவிற்கு பாவூர்சத்திரம், ஆலங்குளம் ஆகிய பகுதிகளில் இருந்து தினசரி நூற்றுக்கணக்கான வாகனங்களில் காய்கறிகள் கொண்டு செல்லப்படுகின்றன. இந்த வாகனங்கள் அனைத்தும் இச்சாலை வழியேதான் சென்று வருகின்றன.

கொல்லத்திலிருந்து திருநெல்வேலிக்கு செங்கோட்டை, தென்காசி வழியாக இயக்கப்படும் ரயில்கள் அனைத்தும் பாவூர்சத்திரம் வழியேதான் சென்று வருகின்றன. மேலும் செங்கோட்டை-திருநெல்வேலி ரயில்களும் சென்று வருகின்றன. பாலருவி எக்ஸ்பிரஸ் ரயிலும் இந்த வழித்தடத்தில்தான் சென்று வருகிறது. தற்போது பாலருவி எக்ஸ்பிரஸ் ரயில் சேவை நிறுத்தப்பட்டுள்ளது.

இந்நிலையில் வாகன நெரிசல் மிகுந்த பாவூர்சத்திரத்தில் ரயில்வே மேம்பாலம் சுரங்கப்பாதை வசதியுடன் அமைக்க வேண்டும் என இப்பகுதி பொதுமக்கள் கோரிக்கை விடுத்து வருகின்றனர். தென்காசி, நெல்லை மாவட்டங்களைச் சேர்ந்த 227 கிராம பொதுமக்கள் பாவூர்சத்திரத்தில் ரயில்வே மேம்பாலம் அமைக்க வலியுறுத்தி பல்வேறு போராட்டங்களை நடத்தி வருகின்றனர்.

இந்நிலையில் திருநெல்வேலி-தென்காசி சாலையில் பாவூர்சத்திரத்தில் ரூ.4 கோடியே 48 லட்சத்து 53 ஆயிரத்து 954 செலவில் ரயில்வே மேம்பாலம் கட்ட ரயில்வே நிர்வாகம் முடிவு செய்துள்ளது. இற்காக டெண்டர் அறிவிப்பை தெற்கு ரயில்வே நிர்வாகம் வெளியிட்டுள்ளது. ரயில்வே மேம்பால பணிகளை முடிக்க 9 மாதங்கள் கால நிர்ணயம் செய்யப்பட்டுள்ளது. வரும் மார்ச் 4ம் தேதிக்குள் டெண்டர் அனுப்பப்பட வேண்டும் என தெரிவிக்கப்பட்டுள்ளது.