தூத்துக்குடியில் பிரதான சாலையில் பணிகள் நிறைவு : இன்று இரவு பயன்பாட்டிற்கு வருகிறது!

தூத்துக்குடியில் ஸ்மார்ட் சிட்டி திட்டத்தின் கீழ் மாநகராட்சி நிர்வாகம் சார்பில் பல இடங்களில் சிமெண்ட் சாலை அமைக்கும் பணி நடைபெற்று வருகிறது. அதுபோல் பால விநாயகர் கோவில் தெரு, காய்கறி மார்க்கெட் சிக்னல், தேவர்புரம் ரோடு தொடர்ச்சி ஆகிய பகுதிகளில் சிமெண்ட் சாலை அமைக்கப்பட்டுள்ளது. இப்பகுதியில் பள்ளிகள், கல்லூரிகள், மார்க்கெட் போன்றவை இயங்கி வருகின்றன. சாலைப் பணிகள் காரணமாக அப்பகுதியில் ஒருபுறத்தில் போக்குவரத்து தடை செய்யப்பட்டு கடுமையான போக்குவரத்து நெரிசல் ஏற்பட்டு வந்தது. 

எனவே, மாநகராட்சி நிர்வாகம் உடனடியாக ஆய்வு செய்து இந்த சாலையை திறந்து விட நடவடிக்கை எடுக்க வேண்டும் என பொதுமக்கள் கோரிக்கை விடுத்து வந்தனர். இந்நிலையில், இந்த சாலைப் பணி்களை நேற்று இரவு மேயர் ஜெகன் பெரியசாமி ஆய்வு செய்தார். மேலும், பாலவிநாயகர் கோவிலில் இருந்து  சுப்பையா வித்யாலயம் பெண்கள் மேல்நிலைப்பள்ளி மற்றும் தெற்கு காவல் நிலையம் வரை செல்லும் சாலைப்பணி நிறைவு பெற்றதால் இன்று இரவு முதல் பொதுமக்களின் பயன்பாட்டிற்கு வருகிறது என தூத்துக்குடி மாநகராட்சி மேயர் அறிவித்துள்ளார்.