ஸ்டெர்லைட் ஆலைக்கு ஆதரவாக பேசிய பாஜக தலைவர் அண்ணாமலைக்கு கண்டனம்!!

ஸ்டெர்லைட் ஆலைக்கு ஆதரவாக பேசிய தமிழக பாஜக தலைவர் அண்ணாமலைக்கு ஸ்டெர்லைட் எதிர்ப்பு மக்கள் கூட்டமைப்பு கண்டனம் தெரிவித்துள்ளது. 

இது தொடர்பாக ஸ்டெர்லைட் எதிர்ப்பு மக்கள் கூட்டமைப்பு  வெளியிட்ட அறிக்கை: 25 ஆண்டுகள் போராடி, 15 உயிர்களை தியாகம் செய்து நாசகார ஸ்டெர்லைட்டை மூடியுள்ளோம்! அந்நிய நாட்டு வேதாந்தா - ஸ்டெர்லைட் எதிர்ப்பு எம் இரத்தத்தில் உள்ளது! காவல்துறை அதிகாரியாக இருந்து, பாஜக தலைவராக நேற்று வந்த அண்ணாமலைக்குத் தெரியாது தூத்துக்குடி மக்களின் போராட்ட வரலாறு.  முதலில் அர்ஜீன் சம்பத், பின்பு ஆளுநர் ஆர்.என்.ரவி, அடுத்து அண்ணாமலை, ஆர்எஸ்எஸ் - பாஜகவிற்கு வேதாந்தா மீதென்ன அக்கறை? 

ஏற்கனவே வேதாந்தாவிடம் பெற்ற நிதிக்கு வேலை செய்கிறீர்களா?  இல்லை கூடுதலாக வாங்கப் பேசுகிறீர்களா? கர்நாடகாவிற்குச் சென்று பாஜக ஆட்சியை முடிவுக்குக் கொண்டு வந்தீர்கள்! இப்போது ஸ்டெர்லைட்டிற்கு ஆதரவாகப் பேசி நிரந்தரமாக ஸ்டெர்லைட்டை மூடுவீர்கள் என நம்புகிறோம்!  கார்ப்பரேட் கைக்கூலி வேலையை நிறுத்திக் கொள்ளுங்கள், இல்லையேல், தூத்துக்குடி மக்கள் உங்களுக்கும், உங்கள் கட்சிக்கும் உரிய பாடம் புகட்டுவோம்! - இவ்வாறு அறிக்கையில் தெரிவிக்கப்பட்டுள்ளது.