» செய்திகள் - விளையாட்டு » தமிழகம்

டிசம்பர் 15-ம் தேதிக்குள் அனைவருக்கும் ஸ்மார்ட் கார்டுகள் வழங்கப்படும்: தமிழக அரசு தகவல்

புதன் 15, நவம்பர் 2017 11:17:49 AM (IST)

ரேஷன் அட்டைகளுக்கு பதிலாக டிசம்பர் 15-ம் தேதிக்குள் அனைவருக்கும் ‘ஸ்மார்ட் கார்டுகள்’ வழங்கப்பட்டுவிடும் என்று தமிழக அரசு தெரிவித்துள்ளது.

இதுகுறித்து தமிழக அரசு வெளியிட்டுள்ள செய்திக்குறிப்பில் கூறப்பட்டு இருப்பதாவது: சென்னை தலைமைச் செயலகத்தில் உணவு மற்றும் நுகர்பொருள் வழங்கல்துறை அமைச்சர் காமராஜ் தலைமையில் தமிழ்நாடு நுகர்பொருள் வாணிபக்கழக நிர்வாக இயக்குனர், உணவு பொருள் வழங்கல் மற்றும் நுகர்வோர் பாதுகாப்புத்துறை ஆணையாளர் ஆகியோருடன் பொது வினியோகத் திட்டம் தொடர்பான கலந்தாய்வு கூட்டம் நேற்று நடைபெற்றது.

பொது வினியோக திட்டத்தை முழு கணினிமயமாக்கும் திட்டத்தின்கீழ் கடந்த ஏப்ரல் 1-ந்தேதி முதல் மின்னணு ரேஷன் கார்டு (ஸ்மார்ட் கார்டு) வழங்கப்பட்டு வருகிறது. 1.93 கோடி குடும்ப அட்டைகளில் இதுவரை 1.71 கோடி குடும்ப அட்டைகள் வழங்கப்பட்டுள்ளன. பொது வினியோக திட்டத்தின் மொத்த பயனாளிகள் 6 கோடியே 74 லட்சத்து 74 ஆயிரத்து 478 ஆகும்.

ஆதார் எண்களை குடும்ப அட்டையுடன் இணைக்காத குடும்ப உறுப்பினர் விவரங்களை பெறுவதற்காக அனைத்து மாவட்ட கலெக்டர்களுக்கும் அறிவுரைகள் வழங்கப்பட்டு, தற்போது அந்தந்த மாவட்டங்களில் சிறப்பு முகாம்கள் நடத்தப்பட்டு வருகிறது. இதுவரை ஸ்மார்ட் கார்டு கிடைக்க பெறாதவர்கள், உடனடியாக வட்ட வழங்கல் அலுவலர்கள் அல்லது மாவட்ட வழங்கல் அலுவலர்கள் அல்லது உதவி ஆணையாளர்கள் மற்றும் துணை ஆணையாளர்களை அணுகி உரிய ஆவணங்களை வழங்குமாறு கேட்டுக்கொள்ளப்பட்டுள்ளது.

இதுவரை வழங்கப்பட்டுள்ள ஸ்மார்ட் கார்டுகள் போக மீதமுள்ள 22 லட்சம் ரேஷன் கார்டுகளில் புகைப்படம் மற்றும் திருத்தங்கள் செய்யும் பணி நடைபெற்று வருகிறது. டிசம்பர் 15-ம் தேதிக்குள் அனைவருக்கும் ஸ்மார்ட் கார்டுகள் வழங்க நடவடிக்கை எடுக்கப்பட்டு வருகிறது. மேலும், அனைத்து பொது வினியோக கிடங்குகளிலும் அத்தியாவசிய பொருட்கள் தேவையான அளவு இருப்பு வைக்கப்பட்டுள்ளது. 

அதிக மழைப்பொழிவு போன்ற நிலை ஏற்பட்டாலும், அதை சமாளிக்கும் வகையில் அனைத்து முன்னெச்சரிக்கை நடவடிக்கைகளும் எடுக்கப்பட்டுள்ளது. தாழ்வான பகுதியில் உள்ள பொது வினியோக கடைகளில் உள்ள அத்தியாவசிய பொருட்களை பாதுகாப்பாக வைக்கவும் அறிவுரை வழங்கப்பட்டுள்ளது. இந்தக்கூட்டத்தில், தமிழ்நாடு நுகர்பொருள் வாணிபக்கழக நிர்வாக இயக்குனர் எம்.சுதாதேவி, உணவு பொருள் வழங்கல் மற்றும் நுகர்வோர் பாதுகாப்புத்துறை ஆணையாளர் எஸ்.மதுமதி மற்றும் துறை அதிகாரிகள் கலந்து கொண்டனர். இவ்வாறு அதில் கூறப்பட்டுள்ளது.


மக்கள் கருத்து


மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.



மேலும் தொடரும் செய்திகள்

Temporary Advts

Sponsored Ads

Sterlite Industries (I) Ltd



Tirunelveli Business Directory