கல்லூரி முன் மாணவி தீக்குளித்து தற்கொலை: காதல் தோல்வியால் விபரீதம்

கோவையில் காதல் தோல்வியால் கல்லூரி முன்பு நடுரோட்டில் உடலில் பெட்ரோல் ஊற்றி தீக்குளித்து மாணவி தற்கொலை செய்து கொண்டார். 

தஞ்சாவூர் மாவட்டம் பட்டுக்கோட்டை சேர்ந்தவர் ரவி. இவரது மகள் சினேகா (19). இவர் கோவை பீளமேட்டில் உள்ள தனியார் கலை அறிவியல் கல்லூரியில் பி.காம் 2ம் ஆண்டு படித்து வந்தார். சினேகா கல்லூரி விடுதியில் தங்கி உள்ளார். இவர் சொந்த ஊர் சென்று விட்டு இன்று அதிகாலை விடுதிக்கு திரும்பினார். இந்நிலையில் இன்று காலை 5.45 மணி அளவில் மாணவி சினேகா கல்லூரி விடுதி அருகே நடுரோட்டில் உடலில் பெட்ரோல் ஊற்றி தீவைத்துக் கொண்டார். 

அவரது அலறல் சத்தம் கேட்டு அவ்வழியாக சென்றவர்கள் படுகாயம் அடைந்த அவரை மீட்டு மருத்துவமனைக்கு அனுப்பி வைத்தனர். ஆனால் அங்கு சிகிச்சை பலனின்றி மாணவி இன்று மதியம் இறந்தார். இதுகுறித்து பீளமேடு போலீசார் நடத்திய விசாரணையில், மாணவி சினேகா ஒருவரை காதலித்து வந்ததாகவும், அந்த காதல் தோல்வியில் முடிந்ததால் தீக்குளித்து தற்கொலை செய்து கொண்டது தெரியவந்தது.