» செய்திகள் - விளையாட்டு » விளையாட்டு

இளையோர் ஒலிம்பிக் போட்டி: ஆக்கியில் இந்திய அணிகளுக்கு வெள்ளிப்பதக்கம்!!

செவ்வாய் 16, அக்டோபர் 2018 12:00:07 PM (IST)



இளையோர் ஒலிம்பிக் போட்டியின் ஆக்கி இறுதி ஆட்டத்தில் இந்திய அணிகள் தோல்வி கண்டு வெள்ளிப்பதக்கம் பெற்றன.

206 நாடுகள் கலந்து கொண்டுள்ள 3-வது இளையோர் (யூத்) ஒலிம்பிக் போட்டி அர்ஜென்டினா தலைநகர் பியூனஸ் அயர்சில் நடந்து வருகிறது. இதன் ஆக்கி (5 பேர்) போட்டியின் ஆண்கள் பிரிவு இறுதி ஆட்டத்தில் இந்தியா-மலேசியா அணிகள் மோதின. விறுவிறுப்பான இந்த ஆட்டத்தில் தொடக்கத்தில் இந்திய அணி முன்னிலை பெற்றது. ஆனால் அந்த முன்னிலையை நீண்ட நேரம் தக்க வைத்து கொள்ள முடியவில்லை. ஆட்டம் போகப்போக இந்திய அணியினரின் தடுப்பு ஆட்டத்தில் ஏற்பட்ட தொய்வை பயன்படுத்தி மலேசிய அணி அடுத்தடுத்து கோல்கள் அடித்தது.

முடிவில் இந்திய அணி 2-4 என்ற கோல் கணக்கில் மலேசியாவிடம் தோல்வி கண்டு வெள்ளிப்பதக்கத்துடன் திருப்தி கண்டது. இந்திய அணி சார்பில் கேப்டன் விவேக் சாகர் பிரசாத் 3-வது மற்றும் 6-வது நிமிடத்தில் கோல் அடித்தார். மலேசிய அணி தரப்பில் பிராதுஸ் ரோஸ்டி 5-வது நிமிடத்திலும், அகிமுல்லா அனார் 14-வது மற்றும் 19-வது நிமிடத்திலும், ஆரிப் இஷாக் 17-வது நிமிடத்திலும் கோல் அடித்தனர்.

பெண்கள் பிரிவில் 

பெண்கள் பிரிவில் நடந்த இறுதிப்போட்டியில் இந்தியா-அர்ஜென்டினா அணிகள் சந்தித்தன. இந்திய அணி முதல் நிமிடத்திலேயே கோல் அடித்தது. அந்த கோலை மும்தாஜ் கான் அடித்தார். அதன் பின்னர் அர்ஜென்டினா அணியினரின் தாக்குதல் ஆட்டத்தை தாக்குப்பிடிக்க முடியாமல் இந்திய அணியினர் திணறினார்கள். அத்துடன் அந்த அணியின் தடுப்பு ஆட்டமும் சிறப்பாக இருந்தால் அதனை தகர்த்து இந்திய அணியினரால் மேலும் கோல் எதுவும் அடிக்க முடியவில்லை. உள்ளூர் ரசிகர்களின் ஆதரவுக்கு மத்தியில் அசுர தாக்குதலை தொடுத்த அர்ஜென்டினா அணி அடுத்தடுத்து 3 கோல் அடித்தனர்.. 

அந்த அணியின் ஜியானெல்லா பாலெட் 7-வது நிமிடத்திலும், சோபியா ராமல்லோ 9-வது நிமிடத்திலும், பிரிசா புருக்ஜெஸ்செர் 12-வது நிமிடத்திலும் கோல் அடித்தனர். அதன் பிறகு இரு அணியினராலும் கோல் எதுவும் அடிக்க முடியவில்லை. முடிவில் அர்ஜென்டினா அணி 3-1 என்ற கோல் கணக்கில் இந்தியாவை வீழ்த்தி தங்கப்பதக்கத்தை தனதாக்கியது. தோல்வி கண்ட இந்திய அணி வெள்ளிப்பதக்கம் பெற்றது. இந்திய அணி இதுவரை 3 தங்கம், 7 வெள்ளி என்று மொத்தம் 10 பதக்கங்கள் வென்று 10-வது இடத்தில் உள்ளது. ரஷியா 24 தங்கம், 11 வெள்ளி, 8 வெண்கலம் என்று 43 பதக்கங்கள் வென்று முதலிடத்தில் நீடிக்கிறது.


மக்கள் கருத்து


மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.



மேலும் தொடரும் செய்திகள்

Sponsored Ads

Sterlite Industries (I) Ltd






Tirunelveli Business Directory