» செய்திகள் - விளையாட்டு » விளையாட்டு

பாகிஸ்தானை ஊதித் தள்ளிய வெஸ்ட்இண்டீஸ் அணி: ஹைலைட்ஸ் விடியோ!

சனி 1, ஜூன் 2019 12:12:38 PM (IST)



பாகிஸ்தானுக்கு எதிரான ஐசிசி ஒருநாள் உலகக் கோப்பை ஆட்டத்தில் வெஸ்ட்இண்டீஸ் அணி 7 விக்கெட் வித்தியாசத்தில் அபார வெற்றி பெற்றது.

10 அணிகள் பங்கேற்றுள்ள 12-வது உலக கோப்பை கிரிக்கெட் திருவிழா இங்கிலாந்தில் நேற்று முன்தினம் தொடங்கியது. இதில் ஒவ்வொரு அணியும் மற்ற அணியுடன் தலா ஒரு முறை மோத வேண்டும். லீக் முடிவில் முதல் 4 இடங்களை பிடிக்கும் அணிகள் அரைஇறுதிக்கு முன்னேறும். இந்த போட்டியின் 2-வது நாளான நேற்று நாட்டிங்காமில் நடந்த 2-வது லீக் ஆட்டத்தில் முன்னாள் சாம்பியன்களான வெஸ்ட்இண்டீஸ்-பாகிஸ்தான் அணிகள் மோதின. டாஸ் வென்ற வெஸ்ட்இண்டீஸ் அணி கேப்டன் ஜாசன் ஹோல்டர் பீல்டிங்கை தேர்வு செய்தார்.

முதலில் பேட்டிங் செய்த பாகிஸ்தான் அணியின் தொடக்க ஆட்டக்காரர்களாக இமாம் உல்-ஹக், பஹார் ஜமான் ஆகியோர் களம் இறங்கினார்கள். முதல் ஓவரை ஷெல்டன் காட்ரெல் வீசினார். அந்த ஓவரில் ஒரு ரன் மட்டுமே விட்டுக்கொடுத்தார். வெஸ்ட்இண்டீஸ் வீரர்களின் புயல் வேக பந்து வீச்சை தாக்குப்பிடிக்க முடியாமல் பாகிஸ்தான் அணியினர் தொடக்கம் முதலே தடுமாறினார்கள். அதிலும் குறிப்பாக ஷாட் பிட்ச் பந்து வீச்சு நன்கு எகிறியதால் அதனை அடிக்க முடியாமல் பாகிஸ்தான் வீரர்கள் விக்கெட்டை இழந்தனர்.

3-வது ஓவரில் பாகிஸ்தான் அணி முதல் விக்கெட்டை இழந்தது. இமாம் உல்-ஹக் (2 ரன்) ஷெல்டன் காட்ரெல் பந்து வீசில் விக்கெட் கீப்பர் ஷாய் ஹோப்பிடம் கேட்ச் கொடுத்து வெளியேறினார். சிறிது நேரம் தாக்குப்பிடித்த பஹார் ஜமான் (22 ரன்) வித்தியாசமான முறையில் ஆட்டம் இழந்தார். ஆந்த்ரே ரஸ்செல் வீசிய பவுன்சர் பந்து பஹார் ஜமானின் ஹெல்மெட்டை தாக்கியதுடன், ஸ்டம்பையும் பதம் பார்த்தது.

பாகிஸ்தான் அணியின் விக்கெட்டுகள் தொடர்ந்து மள, மளவென்று சரிந்தன. 21.4 ஓவர்களில் பாகிஸ்தான் அணி 105 ரன்களில் சுருண்டது. அதிகபட்சமாக பஹார் ஜமான் 22 ரன்னும், பாபர் அசாம் 22 ரன்னும், வஹாப் ரியாஸ் 18 ரன்னும், முகமது ஹபீஸ் 16 ரன்னும் எடுத்தனர். மற்ற வீரர்கள் ஒற்றை இலக்கத்தை தாண்டவில்லை. வெஸ்ட்இண்டீஸ் அணி தரப்பில் ஒஷானே தாமஸ் 4 விக்கெட்டும், ஜாசன் ஹோல்டர் 3 விக்கெட்டும், ஆந்த்ரே ரஸ்செல் 2 விக்கெட்டும் வீழ்த்தினார்கள். உலக கோப்பை கிரிக்கெட் போட்டியில் பாகிஸ்தான் அணியின் 2-வது குறைந்தபட்ச ஸ்கோர் இதுவாகும். இதற்கு முன்பு 1992-ம் ஆண்டில் இங்கிலாந்துக்கு எதிரான ஆட்டத்தில் பாகிஸ்தான் அணி 74 ரன்னில் சுருண்டு இருந்தது.

பின்னர் 106 ரன்கள் எடுத்தால் வெற்றி என்ற எளிதான இலக்குடன் ஆடிய வெஸ்ட்இண்டீஸ் அணி 13.4 ஓவர்களில் 3 விக்கெட் இழப்புக்கு 108 ரன்கள் எடுத்து 7 விக்கெட் வித்தியாசத்தில் அபார வெற்றி பெற்றது. நிகோலஸ் பூரன் சிக்சர் விளாசி அணி வெற்றி இலக்கை எட்டவைத்தார். கிறிஸ் கெய்ல் 50 ரன்னும் (34 பந்துகளில் 6 பவுண்டரி, 3 சிக்சருடன்), ஷாய் ஹோப் 11 ரன்னும், டேரன் பிராவோ ரன் எதுவும் எடுக்காமலும் முகமது அமிர் பந்து வீச்சில் கேட்ச் கொடுத்து அவுட் ஆனார்கள். நிகோலஸ் பூரன் 34 ரன்னுடனும் (19 பந்துகளில் 4 பவுண்டரி, 2 சிக்சருடன்) ஹெட்மயர் 7 ரன்னுடனும் ஆட்டம் இழக்காமல் இருந்தனர். வெஸ்ட்இண்டீஸ் அணியின் வேகப்பந்து வீச்சாளர் ஒஷானே தாமஸ் ஆட்டநாயகன் விருது பெற்றார்.

முதலில் ஆடிய பாக். அணி 105 ரன்களுக்கு ஆல் அவுட்டானது. பின்னர் ஆடிய மே.இ.தீவுகள் 13.4 ஓவர்களிலேயே வெற்றி இலக்கை கடந்து 108 ரன்களுடன் வென்றது. அதிரடி வீரர் கிறிஸ் கெயில் 50 ரன்கள், ஓஷேன் தாமஸ் 4 விக்கெட்டுகளுடன் வெற்றிக்கு வழிவகுத்தனர்.

இந்த ஆட்டத்தின் ஹைலைட்ஸ்:

 


மக்கள் கருத்து


மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.



மேலும் தொடரும் செய்திகள்

Sponsored Ads


Sterlite Industries (I) Ltd



Tirunelveli Business Directory