தூத்துக்குடி விமான நிலையத்திற்கு குரூஸ் பர்னாந்து பெயரை சூட்ட கோரிக்கை!

துாத்துக்குடி புதிய விமான நிலையத்திற்கு, குரூஸ் பர்னாந்து பெயரை "சூட்ட வேண்டும் என்று, ஐ.என்.டி.யு.சி.,மாநில பொது செயலாளர் பெருமாள்சாமி கதிர்வேல் வலியுறுத்தியுள்ளார்.

இது குறித்து, முன்னாள் இளைஞர் தலைவரும், மாநில காங்., பொதுக்குழு உறுப்பினரும், ஐ.என்.டி.யு. சி., மாநில பொது செயலாளருமான பெருமாள்சாமி பிரதமர் மோடி, மத்திய விமான போக்குவரத்து துறை அமைச்சர் மற்றும் அதிகாரிகளுக்கு அனுப்பியுள்ள, கோரிக்கை மனுவில் கூறியிருப்பதாவது; "நமது முன்னோர்களை, காங்கிரஸ் கட்சி தொடர்ந்து கவுரவித்து கொண்டிருக்கிறது. 

அதன்படி, துாத்துக்குடி விமான நிலையத்திற்கு, குரூஸ்பர்னாந்து பெயரை வைக்க வேண்டும் என்பது தான், இந்த பகுதியை சேர்ந்த காங்கிரஸ் மற்றும் இந்திய தேசிய தொழிற்சங்க காங்கிரஸ் விருப்பம் ஆகும்.  1909 மற்றும் 1927க்கு இடையில், ஐந்து முறை, துாத்துக்குடி நகராட்சியின் தலைமையாக தேர்ந்தெடுக்கப்பட்டவர் தான் குரூஸ்பர்னாந்து. அவருக்கு, ராவ் பகதுார் பட்டம் அரசால் வழங்கப்பட்டது. 

முனிசிபாலிட்டி கட்டடம் (ராவ் பகதுார் குரூஸ் பெர் னாண்டஸ் பில்டிங்) அவரது பெயரில் பெய ரிடப்பட்டது. துாத்துக்குடி, திருநெல்வேலி மற்றும் பாளை.,க்கு துாத்துக்குடியிலிருந்து 38 கி.மீ., தொலைவில் உள்ள தாமிரபரணி ஆற்றில் இருந்து 1932ம் ஆண்டில் ரூ.18,23,275 செலவில், கூட்டுநீர் வழங்கல் திட்டத்தை அறிமுகப்படுத்தினார். 1925 மற்றும் 1926ம் ஆண்டுகளில் திட்டத்தின் செலவுகள் ரூ.27,83,765 ஆக அதிகரித்தன. 

இந்த தொகையை மானியமாகவும், கடனாகவும் பெற்று 1938ம் ஆண்டு திட்டத்தை நிறைவு செய்தார். துாத்துக்குடி மக்கள் அப்போது குடிநீர் வசதியைப் பெற்றனர். அவரது சிலைகள் நகராட்சி கட்டடத்தின் முன்பும், துாத்துக்குடி நகரின் நடுவிலும் நிறுவப்பட்டுள்ளது. சாதி. மதம் கடந்து காமராஜர் எப்படி வழிபடுகிறோமோ, அதே போல் இவரும் சாதி மத அடையாளங்களுக்கு அப்பாற்பட்டவர். அவரது பெயரை, துாத்துக்குடி விமான நிலையத்திற்கு சூட்ட வேண்டும். இவ்வாறு மனுவில் குறிப்பிட்டுள்ளார்.