தலைமைத் தேர்தல் ஆணையர் ஞானேஷ் குமாருக்கு எதிராகச் சென்னையில் நடைபெற்ற இளைஞர்களின் போராட்டத்தில் திமுக நாடாளுமன்றக் குழுத் தலைவர் கனிமொழி நேரில் பங்கேற்றுப் பேசினார்.
போராட்டத்தில் கனிமொழி பேசியதாவது: "நாட்டில் ஜனநாயக முறைப்படி நடக்க வேண்டிய அனைத்தும் வெறும் கண்துடைப்பாகவே இருக்கின்றன. தலைமைத் தேர்தல் ஆணையரைத் தேர்வு செய்யும் குழுவில் பாஜக சார்பில் இருவரும், எதிர்க்கட்சித் தலைவரும் இடம்பெறுகின்றனர். இதில் பாஜக சார்பில் உள்ள இருவர் எடுக்கும் முடிவே இறுதியானது என்பதால், அவர்கள் விரும்பும் நபரே தலைமைத் தேர்தல் ஆணையராகத் தேர்வு செய்யப்படுகிறார்.
நாட்டில் ஏதாவது ஒரு முக்கியப் பிரச்சினை நடக்கும்போது, உயர்பதவிகளில் இருப்பவர்கள் எதுவும் பேசாமல் அமைதி காக்கிறார்கள்; அனைத்தும் நடந்து முடிந்த பிறகே வாய் திறக்கிறார்கள்.
எஸ்.ஐ.ஆர். (SIR) நடைமுறையைப் பயன்படுத்தி நாடு முழுவதும் 13 கோடி குடிமக்களின் வாக்களிக்கும் உரிமை பறிக்கப்பட்டுள்ளது. இதில் 74 லட்சம் பேர் உடனடியாக வாக்களிக்கும் உரிமையை இழந்துள்ளனர். குறிப்பாகத் தமிழ்நாட்டின் முன்னாள் முதல்வர் மு.க. ஸ்டாலின் போட்டியிட்ட கொளத்தூர் தொகுதியில் மட்டுமே ஒரு லட்சம் பேரின் பெயர்கள் வாக்காளர் பட்டியலிலிருந்து நீக்கப்பட்டுள்ளன.
யாருக்கெல்லாம் வாக்களிக்கும் உரிமை மறுக்கப்பட்டுள்ளதோ, அந்த உரிமைகளை எல்லாம் மீட்டுத் தருவதற்காகவே இந்த மிகப்பெரிய போராட்டம் நடத்தப்படுகிறது," எனத் தெரிவித்தார்.
இப்போராட்டம் குறித்துத் தனது அதிகாரப்பூர்வ 'எக்ஸ்' (X) சமூக வலைதளப் பக்கத்தில் பதிவிட்டுள்ள கனிமொழி, "எல்லாம் முடிந்துவிட்டது ஞானேஷ் ப்ரோ" எனக் குறிப்பிட்டுத் தலைமைத் தேர்தல் ஆணையருக்குத் தனது கண்டனத்தைப் பதிவு செய்துள்ளார்.