பாரதியார் தினம் மற்றும் குடியரசு தினத்தைக் கொண்டாடும் வகையில், திருநெல்வேலி மாவட்டம் பாளையங்கோட்டை சீவலப்பேரி சாலையில் அமைந்துள்ள தமிழ்நாடு விளையாட்டு மேம்பாட்டு ஆணைய (SDAT) நீச்சல்குள வளாகத்தில், பள்ளி மாணவ-மாணவிகளுக்கான மாநில அளவிலான நீச்சல் போட்டிகள் இன்று (11.11.2026) தொடங்கின.
இப்போட்டிகளைத் திருநெல்வேலி மாவட்ட ஆட்சியர் ஆனந்த் மோகன், கொடியசைத்துத் தொடங்கி வைத்தார். தொடர்ந்து முதல் நாளில் வெற்றி பெற்ற வீராங்கனைகளுக்குப் பதக்கங்கள் மற்றும் பாராட்டுச் சான்றிதழ்களை வழங்கி வாழ்த்து தெரிவித்தார்.
தமிழ்நாடு முழுவதும் வருவாய் மாவட்ட அளவிலான போட்டிகளில் முதல் இரண்டு இடங்களைப் பிடித்த மாணவ, மாணவிகள் இம்மாநிலப் போட்டியில் பங்கேற்கின்றனர். இன்று முதல் நவம்பர் 14-ஆம் தேதி வரை 4 நாட்கள் நடைபெறும் இப்போட்டியில் 47 வகையான பிரிவுகள் இடம்பெற்றுள்ளன.
நவம்பர் 11 மற்றும் 12: மாணவிகளுக்கான போட்டிகளில் 1,100 மாணவிகள் பங்கேற்கின்றனர்.
நவம்பர் 13 மற்றும் 14: மாணவர்களுக்கான போட்டிகளில் 2,200 மாணவர்கள் பங்கேற்கவுள்ளனர்.
மாநில அளவில் முதலிடம் மற்றும் இரண்டாமிடம் பிடிக்கும் மாணவ-மாணவிகள், வரும் ஜனவரி 2027-இல் கோவாவில் நடைபெறும் தேசிய அளவிலான நீச்சல் போட்டிகளில் தமிழ்நாடு சார்பில் பங்கேற்கத் தகுதி பெறுவார்கள்.
இந்நிகழ்ச்சியில் மாவட்ட முதன்மைக் கல்வி அலுவலர் மு.சிவகுமார், மாவட்ட விளையாட்டு அலுவலர் கிருஷ்ணசக்கரவர்த்தி, மாவட்டக் கல்வி அலுவலர்கள் ராமசாமி, மோசஸ், முத்துராஜ், தமிழ்நாடு நீர்நிலை விளையாட்டுக் கழகத் தலைவர் முனைவர் சேதுதிருமாறன், மாவட்ட நீச்சல் சங்கச் செயலாளர் லட்சுமணன், மாவட்ட உடற்கல்வி ஆய்வாளர் ஜெபராஜ் உள்ளிட்ட உடற்கல்வி ஆய்வாளர்கள் மற்றும் நீச்சல் பயிற்சியாளர்கள் பலர் கலந்து கொண்டனர்.