திருநெல்வேலி பாளையங்கோட்டை சுற்றுவட்டாரப் பகுதிகளில் பூட்டியிருந்த 3 வீடுகளின் பூட்டை உடைத்து, அரசு வழக்கறிஞர் உட்பட 3 பேரின் வீடுகளில் 41 பவுன் தங்க நகைகள் மற்றும் பணத்தைக் கொள்ளையடித்துச் சென்ற மர்ம நபர்களைப் போலீசார் தீவிரமாகத் தேடி வருகின்றனர்.
பாளையங்கோட்டை அருகே மேலக்குளத்தைச் சேர்ந்தவர் கண்ணன் (வயது 51). இவர் கடந்த நவம்பர் 1-ஆம் தேதி குடும்பத்துடன் உறவினர் வீட்டு திருமண நிகழ்ச்சிக்குச் சென்றிருந்த நேரத்தில், வீட்டின் பூட்டை உடைத்து உள்ளே புகுந்த மர்ம நபர்கள் பீரோவில் வைக்கப்பட்டிருந்த 25 பவுன் தங்க நகைகள் மற்றும் ரூ.1.5 லட்சம் ரொக்கத்தைக் கொள்ளையடித்துச் சென்றனர்.
பாளையங்கோட்டை கே.டி.சி. நகர் கற்பக விநாயகர் நகரைச் சேர்ந்த சிந்தாமணி (55) என்பவர் தனது குடும்பத்துடன் தேவாலயத்திற்குச் சென்றிருந்த சமயம் பார்த்து, வீட்டின் பூட்டை உடைத்து 7 பவுன் தங்க நகைகள் மற்றும் வெள்ளிப் பொருட்களைத் திருடிச் சென்றனர்.
சேரண்மாதேவி நீதிமன்ற அரசு வழக்கறிஞரான பெருமாள் (48) என்பவர் குடும்பத்துடன் வெளியூர் சென்றிருந்த நிலையில், இவரது வீட்டின் கதவை உடைத்து 9 பவுன் நகைகளைக் கொள்ளையடித்துச் சென்றனர்.
ஒரே நாளில் 41 பவுன் தங்க நகைகள் கொள்ளையடிக்கப்பட்ட சம்பவம் குறித்துப் பாளையங்கோட்டை தாலுகா மற்றும் பெருமாள்புரம் போலீசார் வழக்குப் பதிவு செய்து விசாரணை நடத்தி வருகின்றனர்.
சம்பவ இடங்களுக்கு நேரில் சென்ற மாநகர மற்றும் மாவட்ட கைரேகைத் தடயவியல் நிபுணர்கள் தடயங்களைச் சேகரித்தனர். அப்பகுதிகளில் உள்ள கண்காணிப்பு கேமரா காட்சிப் பதிவுகளை ஆய்வு செய்து வரும் போலீசார், இந்தத் தொடர் கொள்ளைச் சம்பவங்களில் ஈடுபட்டது ஒரே கும்பலா என்ற கோணத்திலும் விசாரணை நடத்தி வருகின்றனர்.
குடியிருப்புப் பகுதிகளில் அடுத்தடுத்து நடைபெற்ற இந்தத் துணிச்சலான கொள்ளைச் சம்பவம் பொதுமக்கள் மத்தியில் பெரும் பீதியை ஏற்படுத்தியுள்ள நிலையில், அப்பகுதியில் மீண்டும் ரோந்து மற்றும் கண்காணிப்புப் பணிகளைத் தீவிரப்படுத்த வேண்டும் எனப் பொதுமக்கள் கோரிக்கை விடுத்துள்ளனர்.