2 ஆண்டு காலம் முடிவடைந்த பிறகு, விருப்பமும் தகுதியும் உள்ள அனைத்து அக்னி வீரர்களும் ஆயுதப் படைகளில் நிரந்தரமாகச் சேர்த்துக் கொள்ளப்படுவார்கள் என முப்படைகளின் தலைமைத் தளபதி ஜெனரல் சுப்ரமணி அறிவித்துள்ளார்.
இந்திய ராணுவத்தில் அக்னிபாத் திட்டத்தின் கீழ் பணியாற்றி வரும் அக்னி வீரர்களுக்கு மேலும் 2 ஆண்டுகள் பணி நீட்டிப்பு வழங்கப்படுவதாகவும், அதன்பின் விருப்பமும் தகுதியும் உள்ளவர்கள் ஆயுதப் படைகளில் நிரந்தரமாகச் சேர்த்துக் கொள்ளப்படுவார்கள் என்றும் முப்படைகளின் தலைமைத் தளபதி ஜெனரல் சுப்ரமணி தெரிவித்துள்ளார்.
இது தொடர்பாகச் செய்தியாளர்களிடம் பேசிய முப்படைகளின் தலைமைத் தளபதி ஜெனரல் சுப்ரமணி கூறியதாவது: "இன்று இந்தியப் பாதுகாப்புப் படைகளுக்கும் நமது அக்னி வீரர்களுக்கும் மிக முக்கியமான நாளாகும். அனைத்து அக்னி வீரர்களும் இந்திய ராணுவத்தில் நிரந்தரமாகச் சேருவதற்கான வழிவகையை மத்திய அமைச்சரவை உருவாக்கியுள்ளது.
அக்னிபாத் திட்டம் கடந்த ஜூன் 14, 2022-ல் தொடங்கப்பட்டபோது, அக்னி வீரர்களின் செயல்பாடு தொடர்ந்து மதிப்பீடு செய்யப்படும் என்றும், இத்திட்டம் அவ்வப்போது மறுஆய்வு செய்யப்படும் என்றும் தெரிவிக்கப்பட்டது. தற்போது முதல் தொகுதியைச் சேர்ந்த அக்னி வீரர்களின் 4 ஆண்டு பணிக்காலம் முடிவடையும் நிலையை எட்டியுள்ளது."
இந்த 4 ஆண்டுகளில் மேற்கொள்ளப்பட்ட செயல்பாட்டு மதிப்பீடுகளின் அடிப்படையில் அவர்களின் பணித்திறன் குறித்து மிகவும் நேர்மறையான கருத்துக்கள் கிடைத்துள்ளன.
ஏற்கெனவே திட்டமிட்டபடி தகுதியின் அடிப்படையில் 25 சதவீத அக்னி வீரர்கள் வழக்கமான ராணுவப் படைகளில் சேர்த்துக்கொள்ளப்பட உள்ளனர். மீதமுள்ள 75 சதவீத அக்னி வீரர்களுக்கு மேலும் 2 ஆண்டுகள் பணி நீட்டிப்பு வழங்கப்படும். இந்த 2 ஆண்டு காலம் முடிந்த பிறகு, விருப்பமும் தகுதியும் உள்ள அனைவரும் ஆயுதப் படைகளில் நிரந்தரமாகச் சேர்த்துக் கொள்ளப்படுவார்கள் என அவர் தெரிவித்தார்.
கடந்த 2022-ல் இத்திட்டம் அறிமுகப்படுத்தப்பட்டபோது, பணிக்காலம் குறைவாக இருப்பது குறித்து நாடு முழுவதும் பல தரப்பிலிருந்தும் கடும் விமர்சனங்களும் போராட்டங்களும் எழுந்தன.
அக்னி வீரர்களுக்குப் பணி பாதுகாப்பு வழங்கப்பட வேண்டும் என்ற கோரிக்கைகள் வலுத்து வந்த நிலையில், மத்திய அரசு தற்போது மேற்கொண்டுள்ள இந்த மாற்றம் அக்னி வீரர்கள் மத்தியில் பெரும் வரவேற்பைப் பெற்றுள்ளது.