சூடானில் டிரோன் தாக்குதலில் மருத்துவமனை இடிந்து தரைமட்டம்: 70 பேர் பலி!

ஆப்பிரிக்காவில் அமைந்துள்ள ஒரு குட்டி நாடு சூடான். அங்கு ராணுவத்துக்கும், ஆர்.எஸ்.எப். எனப்படும் துணை ராணுவத்துக்கும் இடையே நீண்ட காலமாக அதிகாரப்போட்டி நிலவுகிறது. இதற்கிடையே 2023-ம் ஆண்டு ஏப்ரல் மாதம் இந்த மோதல் உள்நாட்டு போராக வெடித்தது. இரு தரப்பினருக்கும் இடையே நடைபெறும் இந்த போரில் இதுவரை சுமார் 28 ஆயிரம் பேர் கொல்லப்பட்டு உள்ளனர்.

இதனால் பாதுகாப்பான இடங்களைத் தேடி 10 லட்சத்துக்கும் மேற்பட்டோர் அண்டை நாடுகளுக்கு வெளியேறி உள்ளனர். எனவே போரை நிறுத்தும்படி உலக நாடுகள் பலவும் வலியுறுத்துகின்றன. அதனை பொருட்படுத்தாமல் இரு தரப்பினரும் தொடர்ந்து மோதலில் ஈடுபட்டு வருகின்றனர். அந்தவகையில் சூடானின் எல் பஷார் நகரில் செயல்பட்டு வரும் மருத்துவமனை மீது டிரோன் தாக்குதல் நடத்தப்பட்டது. இதில் அந்த மருத்துவமனை கட்டிடம் இடிந்து தரைமட்டமானது.

இதனையடுத்து அங்கிருந்தவர்கள் அலறியடித்துக் கொண்டு வெளியே ஓட்டம் பிடித்தனர். எனினும் கட்டிட இடிபாடுகளில் சிக்கி நோயாளிகள் உள்பட 70-க்கும் மேற்பட்டோர் உயிரிழந்தனர். படுகாயம் அடைந்த 20 பேர் மீட்கப்பட்டு அருகில் உள்ள மருத்துவமனையில் சிகிச்சை அளிக்கப்பட்டு வருகிறது. மருத்துவமனை மீதான இந்த தாக்குதல் ஒரு போர்க்குற்றம் ஆகும் என கூறி உலக சுகாதார நிறுவனம் கடும் கண்டனம் தெரிவித்துள்ளது.