ஈரான் பாதுகாப்புப் படைத் தலைவர் அலி லாரிஜானி கொல்லப்பட்டாரா? இஸ்ரேல் அறிவிப்பு!

ஈரானின் தேசிய பாதுகாப்புச் சபைச் செயலாளரும், அந்நாட்டின் மிக முக்கியப் பாதுகாப்பு அதிகாரியுமான அலி லாரிஜானி, இஸ்ரேல் நடத்திய வான்வழித் தாக்குதலில் கொல்லப்பட்டதாக இஸ்ரேல் பாதுகாப்புத் துறை அமைச்சர் இஸ்ரேல் காட்ஸ் இன்று  தெரிவித்துள்ளார்.

இஸ்ரேல் பாதுகாப்பு அமைச்சரின் கூற்றுப்படி, நேற்று இரவு ஈரான் முழுவதும் இஸ்ரேலிய ராணுவம் நடத்திய தீவிர வான்வழித் தாக்குதலில் அலி லாரிஜானி இலக்கு வைக்கப்பட்டார். இத்தாக்குதலில் ஈரான் புரட்சிகர பாதுகாப்புப் படையின் (IRGC) துணை அமைப்பான ‘பசிஜ்’ (Basij) பிரிவின் தளபதி ஜெனரல் குலாம் ரெசா சுலைமானியும் கொல்லப்பட்டதாக இஸ்ரேல் அறிவித்துள்ளது.

கடந்த பிப்ரவரி 28-ம் தேதி, ஈரானின் உச்ச தலைவர் ஆயத்துல்லா அலி காமேனி இஸ்ரேல் மற்றும் அமெரிக்காவின் கூட்டுத் தாக்குதலில் கொல்லப்பட்டதாகக் கூறப்படும் நிலையில், அலி லாரிஜானியின் மரணம் (உறுதிப்படுத்தப்பட்டால்) ஈரான் அரசுக்கு மற்றுமொரு பேரிடியாகக் கருதப்படுகிறது. லாரிஜானி கொல்லப்பட்டதாக இஸ்ரேல் கூறி வரும் நிலையில், ஈரானின் அதிகாரப்பூர்வத் தரப்பில் இருந்து இதுவரை எந்தத் தகவலும் வெளியாகவில்லை.

லாரிஜானி இறந்துவிட்டதாகச் செய்திகள் பரவி வரும் வேளையில், அவரது அதிகாரப்பூர்வ சமூக வலைதளப் பக்கத்தில் (X) இன்று ஒரு பதிவு வெளியிடப்பட்டுள்ளது. அதில், "ஈரான் கடற்படை வீரர்களின் இறுதிச் சடங்கையொட்டி அவர்களுக்கு வீர வணக்கம் செலுத்துவதாகவும், அவர்களின் தியாகம் ஈரானின் ராணுவக் கட்டமைப்பை மேலும் வலுப்படுத்தும்" என்றும் குறிப்பிடப்பட்டுள்ளது. இது அவர் உயிருடன் இருப்பதைக் காட்ட ஈரான் அரசு செய்த முயற்சியாக இருக்கலாம் எனச் சந்தேகிக்கப்படுகிறது.

அமெரிக்காவின் அறிவிப்பு: முன்னதாக, லாரிஜானி உள்ளிட்ட 10 முக்கிய ஈரான் ராணுவத் தலைவர்களைப் பற்றிய தகவல் கொடுப்பவர்களுக்கு 10 மில்லியன் டாலர் (சுமார் 83 கோடி ரூபாய்) வெகுமதி அளிக்கப்படும் என்று அமெரிக்கா அறிவித்திருந்தது குறிப்பிடத்தக்கது.