தாமிரபரணி நதியைக் காக்கத் தீவிர நடவடிக்கை: நெல்லை மாவட்ட ஆட்சியர் ஆனந்த மோகன் உறுதி!

திருநெல்வேலி மாவட்டத்தின் மிக முக்கிய வாழ்வாதார நதியான தாமிரபரணியைக் காக்க மாவட்ட நிர்வாகத்தின் சார்பில் நடவடிக்கைகள் உடனடியாக மேற்கொள்ளப்படும் என மாவட்ட ஆட்சியர் ஆனந்த மோகன்தெரிவித்தார்.

உலகச் சுற்றுச்சூழல் தினத்தையொட்டி, திருநெல்வேலி உடையார்பட்டியில் பெருமளவில் தூர்வாரப்பட்ட குளத்தைப் பராமரித்தல் மற்றும் மாவட்ட நிர்வாகத்திடம் முறைப்படி ஒப்படைக்கும் நிகழ்ச்சி இன்று நடைபெற்றது. 

இந்நிகழ்ச்சிக்குத் தலைமை தாங்கிப் பேசிய நெல்லை மாவட்ட ஆட்சித்தலைவர் ஆனந்த மோகன், பொதுமக்களின் கோரிக்கைக்கு இணங்கத் தாமிரபரணி நதியைக் காக்க மாவட்ட நிர்வாகம் சார்பில் கறார் நடவடிக்கை எடுக்கப்படும் எனப் பகிரங்கமாக உறுதி அளித்துள்ளார்.

நெல்லை மாவட்டத்தின் குளம் மற்றும் ஏரி பராமரிப்புத் திட்டத்தின் கீழ், 'போஷ் இந்தியா' மற்றும் 'போஷ் இந்தியா பவுண்டேஷன்' ஆகிய நிறுவனங்களின் சமூகப் பொறுப்புணர்வு நிதி பங்களிப்புடன், 'எக்ஸ்னரோ சர்வதேச அமைப்பு' மற்றும் மாவட்ட நிர்வாகம் இணைந்து உடையார்பட்டிக் குளத்தைத் தூர்வாரும் பணியை மேற்கொண்டன.

இப்பாரிய தூர்வாரும் பணியை முன்னதாக முன்னாள் மாவட்ட ஆட்சித்தலைவர் மருத்துவர் சுகுமார் முறைப்படி துவக்கி வைத்திருந்தார். பணிகள் அனைத்தும் முழுமையாக நிறைவடைந்ததைத் தொடர்ந்து, தற்போது அதனை மாவட்ட நிர்வாகத்திடம் முறைப்படி ஒப்படைத்தல் மற்றும் தொடர் பராமரிப்புக்கான சிறப்பு விழா இன்று நடைபெற்றது.

நெல்லை மாவட்ட ஆட்சித்தலைவர் ஆனந்த மோகன் இவ்விழாவிற்குத் தலைமை தாங்கி, குளம் அமைந்திருக்கும் வளாகத்தில் புதிய மரக்கன்றுகளை நட்டுச் சிறப்புரையாற்றினார். விழாவில் அவர் பேசுகையில், "பொதுமக்கள் அனைவரும் பல்வேறு நிறுவனங்களோடு தங்களை ஒருங்கிணைத்துக் கொண்டு இப்பெரும் நீர்நிலை மீட்புப் பணியைச் செய்திருப்பது மிகவும் பாராட்டத்தக்கது. 

தூர்வாரப்பட்ட உடையார்பட்டிக் குளத்தைத் தொடர்ந்து செப்பனிட்டுப் பராமரிப்பதற்கும், கரைகளில் மரங்களை நட்டுப் பசுமையாக்குவதற்குமான பணிகளை இன்று நாம் வெற்றிகரமாகத் துவக்கி வைத்துள்ளோம். தொடர்ந்து திறம்பட உடையார்பட்டிக் குளம் சீர்செய்யப்பட்டு முழுமையாகப் பாதுகாக்கப்படும். மேலும், திருநெல்வேலி மாவட்டத்தின் மிக முக்கிய வாழ்வாதார நதியான தாமிரபரணி நதியைக் காக்க வேண்டும் என்ற பொதுமக்களின் நீண்ட நாள் கோரிக்கைக்கு இணங்க, நதியின் தூய்மையைப் பேண மாவட்ட நிர்வாகத்தின் சார்பில் மிகக் கடுமையான நடவடிக்கைகள் உடனடியாக மேற்கொள்ளப்படும்  எனத் தெரிவித்தார்.

போஷ் நிறுவனத்தின் தலைமைப் பொறுப்பாளர் பஞ்சு அருணாசலம் முன்னிலை வகிக்க, எக்ஸ்னரோ அமைப்பின் தலைவர் செந்தூர் பாரி அனைவரையும் வரவேற்றார். இவ்விழாவில் மாவட்ட வருவாய் அலுவலர் துரை, பொதுப்பணித்துறைச் செயற்பொறியாளர் கோவிந்தராஜன், மாநகராட்சி கண்காணிப்புப் பொறியாளர் கண்ணன் மற்றும் கவுன்சிலர் கோகுலவாணி சுரேஷ் உள்படப் பல முக்கியப் பிரமுகர்கள் வாழ்த்துரை வழங்கினர்.

மேலும், வட்டாட்சியர் மாரிமுத்துகுமார், வருவாய் ஆய்வாளர் கண்ணன், எக்ஸ்னரோ சமூகச் செயல்பாட்டாளர் ராதா, விஜய், கபடி முருகன், தச்சை மண்டல முன்னாள் சேர்மன் சுப்பிரமணியன், பசுமை நகர அரிமா பட்டய தலைவர் திருமலைமுருகன், தலைவர் நடராஜன், செயலாளர் சேவியர், கிருஷ்ணகுமார், போஷ் இந்தியா நிறுவன மனிதவள மேம்பாட்டாளர் நிரஞ்சனி, சமூகச் செயல்பாட்டாளர் ராஜேஷ், ஆய்வாளர் பாலமுருகன், லயன்ஸ் திருமலை முருகன் மற்றும் கவுன்சிலர் சுப்பிரமணியன் உட்படப் பலர் பெருந்திரளாகக் கலந்து கொண்டனர். விழாவின் நிறைவாக எழுத்தாளர் முத்தாலங்குறிச்சி காமராசு அனைவருக்கும் நன்றி கூறினார்.