கோவில்பட்டி தொகுதியில் முதல் முறையாக திமுக வெற்றி : சரிந்தது அதிமுக கோட்டை!

கோவில்பட்டி சட்டமன்றத் தொகுதி வரலாற்றில் இதுவரை இல்லாத திருப்புமுனையாக, திமுக வேட்பாளர் கா. கருணாநிதி வெற்றி பெற்று புதிய சாதனையைப் படைத்துள்ளார். 

இத்தொகுதியில் கடந்த 20 ஆண்டுகளாகத் தொடர்ந்த அதிமுகவின் ஆதிக்கம் இத்தேர்தலில் முடிவுக்கு வந்துள்ளது.

இத்தொகுதியில் பதிவான 1,91,807 வாக்குகளில், முன்னணி வேட்பாளர்கள் பெற்ற விவரம்:

கா. கருணாநிதி (திமுக): 60,701 வாக்குகள் (வெற்றி)

பாலசுப்பிரமணியன் (தவெக): 59,946 வாக்குகள்

கடம்பூர் செ. ராஜு (அதிமுக): 52,264 வாக்குகள்

பாண்டி (நாதக): 11,665 வாக்குகள்

கோவில்பட்டி தொகுதியில் இதுவரை நடைபெற்ற 16 தேர்தல்களில் திமுக ஒருமுறை கூட வெற்றி பெற்றதில்லை. காங்கிரஸ், இந்திய கம்யூனிஸ்ட் மற்றும் அதிமுக ஆகிய கட்சிகளே இத்தொகுதியை மாறி மாறித் தக்கவைத்து வந்தன. தற்போது நகர்மன்றத் தலைவராக இருந்த கா. கருணாநிதி, திமுகவின் முதல் வெற்றியைப் பதிவு செய்து சரித்திரம் படைத்துள்ளார்.

வாக்கு எண்ணிக்கையின் போது திமுக மற்றும் தமிழக வெற்றிக் கழகம் (தவெக) இடையே மிகக் கடும் போட்டி நிலவியது. முதல் 2 சுற்றுகளில் தவெக வேட்பாளர் பாலசுப்பிரமணியன் முன்னிலை வகித்தார். 21-வது சுற்றில் திமுக-வை விட 511 வாக்குகள் வித்தியாசத்தில் தவெக மீண்டும் முன்னிலைக்கு வந்து பரபரப்பை ஏற்படுத்தியது. இருப்பினும், இறுதிச் சுற்றில் திமுக வேட்பாளர் 755 வாக்குகள் வித்தியாசத்தில் வெற்றியை உறுதி செய்தார்.

2006-ம் ஆண்டு முதல் அதிமுகவின் கோட்டையாக விளங்கிய இத்தொகுதியில், தொடர்ந்து மூன்று முறை வெற்றி பெற்று அமைச்சராகவும் இருந்த கடம்பூர் செ. ராஜு, இந்த முறை மூன்றாவது இடத்திற்குத் தள்ளப்பட்டது பெரும் அதிர்ச்சியை ஏற்படுத்தியுள்ளது.