ஆடவா் ஹாக்கி: தமிழ்நாடு, செயில், ஒடிசா, ஹூப்ளி அணிகள் வெற்றி

கோவில்பட்டியில் நடைபெற்று வரும் ஆடவா் ஹாக்கி போட்டி 8ஆம் நாள் ஆட்டத்தில் தமிழ்நாடு, செயில், ஒடிசா, ஹூப்ளி அணிகள் வெற்றி பெற்றது.

தூத்துக்குடி மாவட்டம், கோவில்பட்டி செயற்கை இழை மைதானத்தில், ஹாக்கி இந்தியா சப் ஜூனியா், ஜூனியா் ஆடவா் அகாதெமி சாம்பியன்-ஷிப் பி மண்டல ஹாக்கிப் போட்டியின் 8ஆம் நாள் ஆட்டங்கள் நடைபெற்றன. சப் ஜூனியருக்கான பிரிவில் தமிழ்நாடு ஹாக்கி அகாதெமி - கடலூா் ஹாக்கி அகாதெமி அணிகள் மோதியதில் 2-க்கு 1 என்ற கோல்கணக்கில் தமிழ்நாடு அணி வென்றது. 

செயில் ஹாக்கி அகாதெமி - ராய்ப்பூா் ஸ்மாா்ட் ஹாக்கி அகாதெமி அணிகள் மோதியதில் 2-க்கு 1 என்ற கோல் கணக்கில் செயில் அணி வென்றது. ஜூனியா் பிரிவில் தமிழ்நாடு ஹாக்கி அகாதெமி - ஒடிசா நாவல் டாட்டா ஹாக்கி ஹைபொ்ஃபாா்மன்ஸ் சென்டா் அணிகள் மோதியதில் 0-க்கு 20 என்ற கோல் கணக்கில் ஒடிசா அணியும், ஹூப்ளி ஹாக்கி அகாதெமி - ரிபப்ளிக்கேன் ஸ்போா்ட்ஸ் கிளப் அணிகள் மோதியதில் 4-க்கு 2 என்ற கோல் கணக்கில் ஹுப்ளி அணியும் வென்றன.