பாகிஸ்தான் மண்ணில் வெஸ்ட் இண்டீஸ் அணி 34 ஆண்டுக்கு பிறகு வெற்றி!

டெஸ்ட் கிரிக்கெட்டில் பாகிஸ்தானை அதன் சொந்த மண்ணில் 34 ஆண்டுக்கு பிறகு தோற்கடித்து வெஸ்ட் இண்டீஸ் சாதனை படைத்துள்ளது.

பாகிஸ்தான் - வெஸ்ட்இண்டீஸ் அணிகள் இடையிலான 2-வது மற்றும் கடைசி டெஸ்ட் கிரிக்கெட் போட்டி முல்தானில் கடந்த 25-ந் தேதி தொடங்கியது. சுழற்பந்து வீச்சுக்கு அனுகூலமான இந்த ஆடுகளத்தில் முதல் இன்னிங்சில் முறையே வெஸ்ட்இண்டீஸ் 163 ரன்னிலும், பாகிஸ்தான் 154 ரன்னிலும் அடங்கின.

9 ரன் முன்னிலையுடன் 2-வது இன்னிங்சை ஆடிய வெஸ்ட்இண்டீஸ் அணி 244 ரன்கள் எடுத்து ஆல்-அவுட் ஆனது. இதனால் 254 ரன்கள் எடுத்தால் வெற்றி என்ற இலக்குடன் 2-வது இன்னிங்சை தொடங்கிய பாகிஸ்தான் 2-வது நாள் முடிவில் 24 ஓவர்களில் 4 விக்கெட்டுக்கு 76 ரன்களுடன் தடுமாறியது.

இநத நிலையில் 3-வது நாள் ஆட்டம் நேற்று நடந்தது. எதிர்பார்த்தபடியே சுழற்பந்து வீச்சில் விக்கெட்டுகள் வேகமாக சரிந்தன. தொடர்ந்து ஆடிய சாத் ஷகீல் (13) மேற்கொண்டு ரன் எதுவும் எடுக்காமல் முதல் ஓவரிலும், காஷிப் அலி (1 ரன்) அடுத்த ஓவரிலும் ஆட்டமிழந்தனர்.

அடுத்து களம் கண்டு சற்று தாக்குப்பிடித்த சல்மான் ஆஹா 15 ரன்னிலும், விக்கெட் கீப்பர் முகமது ரிஸ்வான் 25 ரன்னிலும் இடக்கை சுழற்பந்து வீச்சாளர் ஜோமல் வாரிகனின் சுழலில் சிக்கினர். கடைசி விக்கெட்டாக சஜித் கான் (7 ரன்) போல்டு ஆனார்.

44 ஓவர்களில் பாகிஸ்தான் அணி 133 ரன்னில் சுருண்டது. இதனால் வெஸ்ட்இண்டீஸ் 120 ரன்கள் வித்தியாசத்தில் அபார வெற்றி பெற்றது. வெஸ்ட்இண்டீஸ் தரப்பில் சுழற்பந்து வீச்சாளர்கள் ஜோமல் வாரிகன் 5 விக்கெட்டும், கெவின் சின்கிளேர் 3 விக்கெட்டும், குடகேஷ் மோட்டி 2 விக்கெட்டும் வீழ்த்தினர். பாகிஸ்தான் மண்ணில் கடந்த 34 ஆண்டுகளில் வெஸ்ட்இண்டீஸ் அணி ருசித்த முதல் டெஸ்ட் வெற்றி இதுவாகும். கடைசியாக 1990-ம் ஆண்டு நவம்பர் மாதம் பைசலாபாத்தில் நடந்த டெஸ்டில் 7 விக்கெட் வித்தியாசத்தில் வென்று இருந்தது.

இந்த வெற்றியின் மூலம் வெஸ்ட்இண்டீஸ் அணி 2 போட்டிகள் கொண்ட டெஸ்ட் தொடரை 1-1 என்ற கணக்கில் சமன் செய்தது. முதலாவது டெஸ்டில் பாகிஸ்தான் 127 ரன்கள் வித்தியாசத்தில் வெற்றி பெற்றிருந்தது. வெஸ்ட்இண்டீஸ் வீரர் ஜோமல் வாரிகன் ஆட்டநாயகன் (9 விக்கெட்) மற்றும் தொடர்நாயகன் (மொத்தம் 19 விக்கெட்) விருதை கைப்பற்றினார்.

இந்த தொடரில் சுழற்பந்து வீச்சாளர்கள் மொத்தம் 69 விக்கெட்டுகளை அறுவடை செய்துள்ளனர். இரு ஆட்டங்கள் கொண்ட டெஸ்ட் தொடர் ஒன்றில் சுழற்பந்து வீச்சாளர்கள் வீழ்த்திய அதிகபட்ச விக்கெட் இதுவாகும். இதற்கு முன்பு 2021-ம் ஆண்டு நடந்த இலங்கை-வெஸ்ட்இண்டீஸ் தொடரில் 67 விக்கெட் வீழ்த்தியதே இந்த வகையில் சாதனையாக இருந்தது.

தோல்விக்கு பிறகு பாகிஸ்தான் கேப்டன் ஷான் மசூத் கூறுகையில் ‘வெஸ்ட்இண்டீஸ் அணியினர் நன்றாக பேட்டிங் செய்தனர். ஆனால் நாமும் கற்றுக்கொள்ள வேண்டும். முதல் இன்னிங்சில் வெஸ்ட்இண்டீசின் கடைசி கட்ட வீரர்கள் அதிக ரன் எடுக்க எங்கள் பவுலர்கள் அனுமதித்தது பின்னடைவை ஏற்படுத்தியது. இதேபோல் தான் தென்ஆப்பிரிக்காவிலும் நாங்கள் ரன்களை விட்டுக்கொடுத்தோம். 

இந்த டெஸ்டில் நாங்கள் தோற்றாலும் முதல் நாளில் நாங்கள் விரும்பிய படி நல்ல நிலையில் தான் இருந்தோம். ஒரு மோசமான செயல்பாடு பாதிப்பை ஏற்படுத்தி விட்டது. நாங்கள் தொடர்ந்து தைரியமாக இந்த மாதிரியான ஆடுகளத்தை பயன்படுத்த வேண்டும். ஒரு கூடுதல் விக்கெட், ஒரு கூடுதல் பார்ட்னர்ஷிப் ஆட்டத்தில் மிகப்பெரிய தாக்கத்தை ஏற்படுத்தும் என்பதை நாங்கள் ஒரு அணியாக உணர்ந்துள்ளோம்’ என்றார்.

வெஸ்ட் இண்டீஸ் கேப்டன் கிரேக் பிராத்வெய்ட் கூறுகையில், ‘இந்த வெற்றி எங்களுக்கு மிகவும் முக்கியமானது. எத்தகைய சீதோஷ்ண நிலை இருந்தாலும் நம்பிக்கையுடன் சரியாக திட்டமிட்டு செயல்பட்டால் சாதிக்கலாம் என்பதை காட்டியுள்ளோம். வாரிகன் முதல் பந்தில் இருந்தே அருமையாக பந்து வீசினார். அவரை நினைத்து மிகவும் பெருமை அடைகிறேன்’ என்றார்.

பாகிஸ்தானுக்கு கடைசி இடம்: வெஸ்ட் இண்டீசிடம் தோற்றதன் மூலம் 3-வது உலக டெஸ்ட் சாம்பியன்ஷிப் புள்ளிபட்டியலில் பாகிஸ்தான் அணி கடைசி இடத்துக்கு தள்ளப்பட்டது. அந்த அணி 27.98 சதவீத புள்ளியுடன் 9-வது இடத்தில் இருக்கிறது. ெவஸ்ட் இண்டீஸ் ஒரு இடம் ஏற்றம் கண்டு 28.21 சதவீத புள்ளியுடன் 8-வது இடத்தை பெற்றுள்ளது. தென்ஆப்பிரிக்கா, ஆஸ்திரேலிய அணிகள் ஏற்கனவே இறுதிப்போட்டிக்கு தகுதி பெற்று விட்டது குறிப்பிடத்தக்கது.