வருண் சக்கரவர்த்தியின் மிஸ்டரி முடிவுக்கு வந்ததா? விமர்சனங்களுக்கு கே.கே.ஆர் பயிற்சியாளர் பதிலடி!

கொல்கத்தா நைட் ரைடர்ஸ் அணியின் 'மிஸ்டரி ஸ்பின்னர்' என்று அழைக்கப்படும் வருண் சக்கரவர்த்தியின் சமீபத்திய ஆட்டத்திறன் குறித்து எழுந்துள்ள விமர்சனங்களுக்கு, அந்த அணியின் உதவிப் பயிற்சியாளர் அபிஷேக் நாயர் முற்றுப்புள்ளி வைத்துள்ளார்.

நடப்பு 2026 ஐபிஎல் தொடரில் வருண் சக்கரவர்த்தியின் பந்துவீச்சு எதிர்பார்த்த அளவு எடுபடவில்லை. குறிப்பாக மும்பை இந்தியன்ஸ் அணிக்கு எதிரான போட்டியில் 4 ஓவர்கள் வீசி விக்கெட் ஏதுமின்றி 48 ரன்களை வாரி வழங்கினார். ரோஹித் சர்மா உள்ளிட்ட பேட்ஸ்மேன்கள் அவரது பந்துவீச்சை மிக எளிதாக எதிர்கொண்டனர். முன்னதாக நடைபெற்ற டி20 உலகக்கோப்பை தொடரிலும் அவரது எகானமி ரேட் 9.24 ஆக இருந்தது குறிப்பிடத்தக்கது. 

இதனால், வருணின் "மிஸ்டரி"யை பேட்ஸ்மேன்கள் கணித்துவிட்டனர் என்றும், அவரது கிரிக்கெட் வாழ்வு முடிவுக்கு வந்துவிட்டது என்றும் சமூக வலைதளங்களில் விவாதங்கள் கிளம்பின. விமர்சனங்கள் குறித்துப் பேசிய அபிஷேக் நாயர் "வருண் சக்கரவர்த்தி தனது கிரிக்கெட் பயணத்தில் பல கடினமான சவால்களைக் கடந்து வந்தவர். அவருக்கு கே.கே.ஆர் நிர்வாகமும், பயிற்சியாளர்களும் முழுமையான ஆதரவை வழங்குகிறோம்.

தற்போது எதிரணிகள் அவரை நுணுக்கமாகக் கவனித்துத் திட்டமிட்டு விளையாடுகின்றன. இதற்காக அவர் மீண்டும் ஃபார்முக்கு வரமாட்டார் என்று அர்த்தமல்ல. அவர் மனரீதியாக மிகவும் வலிமையாக இருக்கிறார். நிச்சயம் பழையபடி விக்கெட்டுகளை வீழ்த்தி மைதானத்தில் கர்ஜிப்பார்   என்றார்..

இந்திய அணிக்காக விளையாடிய பிறகு வருண் மீதான எதிர்பார்ப்பு அதிகரித்துள்ளது. பேட்ஸ்மேன்கள் மிடில் ஓவர்களில் அவரை குறிவைத்து அதிரடி காட்டுகின்றனர். ஒரு சிறிய தவறு செய்தாலும் பவுண்டரிகள் விளாசப்படுகின்றன. இருப்பினும், இக்கட்டான நேரங்களில் கே.கே.ஆர் அணி இப்போதும் வருணைத் தான் நம்புகிறது. வரும் போட்டிகளில் சன்ரைசர்ஸ் ஹைதராபாத் போன்ற வலுவான பேட்டிங் வரிசை கொண்ட அணிகளுக்கு எதிராக வருண் சக்கரவர்த்தி தனது பழைய மேஜிக்கை நிகழ்த்துவாரா என்பதே ரசிகர்களின் எதிர்பார்ப்பாக உள்ளது.