போயஸ் கார்டனில் ரஜினியுடன் சீமான் திடீர் சந்திப்பு

போயஸ் கார்டன் இல்லத்தில் நடிகர் ரஜினிகாந்த் உடன் நாம் தமிழர் கட்சியின் தலைமை ஒருங்கிணைப்பாளர் சீமான் சந்தித்து பேசினார். 

சென்னை போயஸ் கார்டனில் உள்ள இல்லத்திற்கு சென்ற நாம் தமிழர் கட்சியின் தலைமை ஒருங்கிணைப்பாளர் சீமான், ரஜினிகாந்தை சந்தித்து பேசினார். இந்த சந்திப்பில் திரையுலகை பற்றியும் தற்போதைய அரசியல் சூழ்நிலை பற்றியும் ரஜினிகாந்த்தும் சீமானும் பேசிக் கொண்டதாக தகவல் வெளியாகியுள்ளது. முந்தைய காலங்களில் ரஜினிகாந்த்தின் அரசியல் வருகையை நாம் தமிழர் கட்சியின் சீமான் கடுமையாக விமர்சித்து பேசி இருந்தது குறிப்பிடத்தக்கது. 

தனது பிறந்தநாளன்று நடிகர் ரஜினிகாந்தை சந்திக்க சீமான் நேரம் கேட்டிருந்தார். ஆனால், அன்றைய தினம் படப்பிடிப்பு காரணமாக சந்திக்க முடியவில்லை. இதையடுத்து, நடிகர் ரஜினிகாந்தை சீமான் இன்று சந்தித்துள்ளார். இந்த திடீர் சந்திப்பு அரசியல் வட்டாரத்தில் பரபரப்பை ஏற்படுத்தியுள்ளது. அதேவேளை, இந்த சந்திப்பின்போது அரசியல் குறித்து எதுவும் பேசவில்லை என தகவல் வெளியாகியுள்ளது.