சிவகார்த்திகேயன் - வெங்கட் பிரபு திரைப்படம் ட்ராப்? சேயோன் முடிவால் திடீர் திருப்பம்!

இயக்குநர் வெங்கட் பிரபு இயக்கத்தில் சிவகார்த்திகேயன் நடிக்கவிருந்த புதிய திரைப்படம் கைவிடப்படுவதாக தகவல் வெளியாகி உள்ளது.

நடிகர் சிவகார்த்திகேயன் தற்போது தனது 26-வது திரைப்படத்தில் (SK26) கவனம் செலுத்தி வருகிறார். இப்படத்தை கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் தயாரிக்கிறது. சமீபத்தில் வெளியான 'தாய் கிழவி' திரைப்படத்தின் இயக்குநர் சிவகுமார் முருகேசன் இதனை இயக்குகிறார். இப்படத்திற்கு ‘சேயோன்’ எனப் பெயரிடப்பட்டுள்ளதை உறுதிப்படுத்தும் வகையில், அதிகாரப்பூர்வ போஸ்டரைத் தயாரிப்பு நிறுவனம் ஏற்கனவே வெளியிட்டுள்ளது.

உண்மையில், 'சேயோன்' திரைப்படத்திற்கு முன்பே வெங்கட் பிரபு இயக்கத்தில் சிவகார்த்திகேயன் நடிப்பார் என்று எதிர்பார்க்கப்பட்டது. இதற்கான ஆரம்பகட்டப் பேச்சுவார்த்தைகள் மற்றும் கதை ஆலோசனைகள் கடந்த ஓராண்டிற்கும் மேலாக நடைபெற்று வந்தன. ஆனால், இந்தப் படம் குறித்த அடுத்தகட்ட அறிவிப்புகள் ஏதும் வெளியாகாமல் இழுபறியிலேயே நீடித்து வந்தது.

வெங்கட் பிரபு சொன்ன கதையில் சிவகார்த்திகேயனுக்கு முழுமையான திருப்தி ஏற்படவில்லை என்றும், அதன் காரணமாகவே அவர் 'சேயோன்' படத்தில் நடிக்க சம்மதித்தார் என்றும் கூறப்படுகிறது.

தற்போது கிடைத்துள்ள தகவல்களின்படி, வெங்கட் பிரபு உடனான அந்தத் திட்டத்திலிருந்து சிவகார்த்திகேயன் முற்றிலும் விலகிவிட்டதாகத் தெரிகிறது. இதன் காரணமாக அந்தத் திரைப்படம் தற்காலிகமாகவோ அல்லது நிரந்தரமாகவோ கைவிடப்படலாம் என்று சினிமா வட்டாரங்கள் தெரிவிக்கின்றன.