புரட்டாசி மாதச் சனிக்கிழமைகளை முன்னிட்டு, பிரசித்தி பெற்ற நவதிருப்பதி திருத்தலங்களுக்குச் செல்லும் ஆன்மீக பக்தர்களின் வசதிக்காகப் போக்குவரத்துக் கழகம் சார்பில் சிறப்புப் பேருந்துகள் இயக்கப்படுகின்றன. இதன்படி புரட்டாசி மாதத்தின் முதல் சனிக்கிழமையான இன்று (செப்டம்பர் 19) நவதிருப்பதி புனித யாத்திரைக்காகத் திருநெல்வேலியிலிருந்து 3 சிறப்புப் பேருந்துகள் இயக்கப்பட்டன.
இச் சிறப்புப் பேருந்து சேவையைப் போக்குவரத்துக்கழக மேலாண்மை இயக்குநர் கே. செல்வம் கொடியசைத்துத் தொடக்கி வைத்தார். தொடர்ந்து பயணத்தில் பங்கேற்ற பக்தர்களுக்குத் தனது நல்வாழ்த்துகளைத் தெரிவித்த அவர், அவர்களுக்குக் குளிர்பானங்கள் மற்றும் புத்துணர்வுப் பலகாரங்களை வழங்கி வழி அனுப்பி வைத்தார்.
இந்நிகழ்ச்சியில் போக்குவரத்துக்கழகப் பொது மேலாளர் மோகன் குமார், தலைமை அலுவலகம் மற்றும் மண்டல அலுவலக உயர் அலுவலர்கள், பணியாளர்கள் பலர் கலந்துகொண்டனர்.
புரட்டாசி மாதத்தில் வரும் அனைத்துச் சனிக்கிழமைகளிலும் பக்தர்கள் நவதிருப்பதி ஸ்தலங்களை எளிதில் தரிசித்து வர ஏதுவாக இச் சிறப்புப் பேருந்து சேவைகள் தொடர்ச்சியாக இயக்கப்படும் எனப் போக்குவரத்துக்கழக நிர்வாகம் சார்பில் தெரிவிக்கப்பட்டுள்ளது.