பாரத மாதாவுக்கு உங்கள் திறமை தேவை: அமெரிக்க வாழ் இந்தியர்களுக்கு ஸ்ரீதர் வேம்பு அழைப்பு!

» செய்திகள் - விளையாட்டு » இந்தியா

பாரத மாதாவுக்கு உங்கள் திறமை தேவை: அமெரிக்க வாழ் இந்தியர்களுக்கு ஸ்ரீதர் வேம்பு அழைப்பு!

செவ்வாய் 28, ஏப்ரல் 2026 10:19:11 AM (IST)

அமெரிக்காவின் விசா கெடுபிடி நிலவும் சூழலில் இந்தியத் திறமையாளர்கள் தாயகம் திரும்ப வேண்டும் என்று ஸோஹோ ஸ்ரீதர் வேம்பு வேண்டுகோள் விடுத்துள்ளார்...

இந்திய தொழில்நுட்பத் துறையில் புரட்சிகரமான மாற்றங்களை ஏற்படுத்தி வரும் ஸோஹோ நிறுவனத்தின் தலைவர் ஸ்ரீதர் வேம்பு, அமெரிக்காவில் வாழும் இந்தியர்கள் தாயகம் திரும்ப வேண்டும் என உருக்கமான வேண்டுகோள் விடுத்துள்ளார்.

இது குறித்து அவர் தனது எக்ஸ் (X) தளத்தில் பதிவிட்டுள்ள கடிதம் தற்போது சமூக வலைதளங்களில் பெரும் விவாதத்தை ஏற்படுத்தியுள்ளது. அமெரிக்க அதிபர் டொனால்ட் ட்ரம்ப் தலைமையிலான அரசு, "அமெரிக்கர்களுக்கே வேலை" என்ற கொள்கையின் அடிப்படையில் பல்வேறு அதிரடி நடவடிக்கைகளை எடுத்து வருகிறது.

குறிப்பாக H-1B விசா நடைமுறைகளில் கடுமையான மாற்றங்கள் மற்றும் கட்டுப்பாடுகள். அமெரிக்க வேலைவாய்ப்புகளில் வெளிநாட்டினரை அமர்த்துவதற்கு எதிரான புதிய விதிகள். இந்தச் சூழலைச் சுட்டிக்காட்டியுள்ள ஸ்ரீதர் வேம்பு, அமெரிக்க வாழ் இந்தியர்கள் எதிர்கொள்ளும் சவால்கள் குறித்து விரிவாகப் பேசியுள்ளார்.

தனது பதிவில் அவர் குறிப்பிட்டதாவது: "37 ஆண்டுகளுக்கு முன்பு நான் செய்ததைப் போலவே, நீங்களும் வெறும் கையுடன், ஆனால் இந்தியாவின் தரமான கல்வி மற்றும் கலாசாரப் பாரம்பரியத்துடன் அமெரிக்காவிற்கு வந்தீர்கள். அங்கு மகத்தான வெற்றியைப் பெற்றுள்ளீர்கள். நமக்கு நல்வாழ்வு அளித்த அமெரிக்காவிற்கு நாம் எப்போதும் நன்றியுடன் இருக்க வேண்டும்; ஏனெனில் நன்றியுணர்வே நமது நாட்டின் அடையாளம்."

தொடர்ந்து அவர் பேசுகையில், கணிசமான எண்ணிக்கையிலான அமெரிக்கர்கள், இந்தியர்கள் தங்கள் வேலைவாய்ப்புகளைப் பறிப்பதாகக் கருதுவதையும், இந்தியர்களின் வெற்றி நியாயமற்றது என நம்புவதையும் சுட்டிக்காட்டினார். "அடுத்த தேர்தல் இந்த நிலையை மாற்றிவிடும் என்று நீங்கள் நினைக்கலாம். ஆனால், உண்மை நிலை அவ்வாறு இல்லை," என அவர் எச்சரித்துள்ளார்.

இந்தியாவிற்குத் திரும்புவதன் அவசியத்தை வலியுறுத்திய ஸ்ரீதர் வேம்பு, பின்வரும் முக்கியக் கருத்துகளை முன்வைத்தார்: மரியாதை என்பது நாட்டின் நிலை: ஒரு இந்தியர் உலகெங்கிலும் பெறும் மரியாதை என்பது இந்தியாவின் பொருளாதார மற்றும் தொழில்நுட்ப நிலையைச் சார்ந்தே இருக்கும். இந்தியா ஏழையாக நீடித்தால் நமக்கு உலக அரங்கில் வெறும் 'அறநெறி போதனைகள்' மட்டுமே மிஞ்சும்.

இந்தியா சிறந்த அறிவுத்திறனை உருவாக்குகிறது. ஆனால், துரதிர்ஷ்டவசமாக அந்தத் திறமையின் பெரும்பகுதியை நாம் அமெரிக்கா போன்ற நாடுகளுக்கு ஏற்றுமதி செய்துவிடுகிறோம். இந்தியாவின் பரந்த இளைஞர் சமுதாயத்தைச் செழிப்பான பாதைக்கு அழைத்துச் செல்ல, அமெரிக்காவில் வாழும் இந்தியர்கள் பெற்றுள்ள 'தொழில்நுட்பத் தலைமைத்துவம்' (Technical Leadership) தாயகத்திற்குத் தேவைப்படுகிறது.

"பாரத மாதாவுக்கு உங்கள் திறமை தேவை. உங்களில் பலருக்கு இது கடினமான முடிவாக இருக்கலாம். இருப்பினும், ஒரு சமுதாயப் பணியாகக் கருதி தயவுசெய்து தாயகம் திரும்புங்கள்," என ஸ்ரீதர் வேம்பு தனது கடிதத்தை நிறைவு செய்துள்ளார்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து:

பாரத மாதாவுக்கு உங்கள் திறமை தேவை: அமெரிக்க வாழ் இந்தியர்களுக்கு ஸ்ரீதர் வேம்பு அழைப்பு!

» செய்திகள் - விளையாட்டு » இந்தியா