கேரளாவில் காங்கிரஸ் கூட்டணி அபார வெற்றி : வாக்காளர்களுக்கு பிரியங்கா காந்தி நன்றி!

கேரளச் சட்டமன்றத் தேர்தலில் காங்கிரஸ் தலைமையிலான ஐக்கிய ஜனநாயக முன்னணி ஆட்சியைப் பிடித்துள்ள நிலையில், அம்மாநில வாக்காளர்களுக்கு காங்கிரஸ் பொதுச்செயலாளர் பிரியங்கா காந்தி தனது மனமார்ந்த நன்றியைத் தெரிவித்துள்ளார்.

தேர்தல் முடிவுகள் வெளியானதைத் தொடர்ந்து, தனது அதிகாரப்பூர்வ 'எக்ஸ்' (X) தளத்தில் பதிவிட்டுள்ள பிரியங்கா காந்தி கூறியிருப்பதாவது:"கேரளத்தில் உள்ள எனது அன்பிற்குரிய சகோதர, சகோதரிகள் எங்கள் மீது வைத்துள்ள நம்பிக்கைக்கும், அளித்துள்ள அபரிமிதமான ஆதரவுக்கும் தலைவணங்கி நன்றி தெரிவித்துக்கொள்கிறேன். நீங்கள் எங்கள் மீது வைத்துள்ள இந்த அசைக்க முடியாத நம்பிக்கை, வரும் காலங்களில் ஐக்கிய ஜனநாயக முன்னணிக்கு ஒரு வழிகாட்டும் சக்தியாக இருக்கும்.

கேரள மக்களின் நலனுக்காக காங்கிரஸ் கூட்டணி அயராது உழைக்கும் என்பதை வலியுறுத்திய அவர், "உங்கள் ஒவ்வொருவருக்கும் ஒரு ஒளிமயமான மற்றும் சிறப்பான எதிர்காலம் அமைய நாங்கள் கடினமாக உழைப்போம். அடுத்த 5 ஆண்டுகளில், ஒவ்வொரு நாளும் எங்களின் மக்கள் பணிகளின் மூலம் எங்களின் நன்றிக்கடன் பிரதிபலிக்கும்," என உறுதியளித்துள்ளார்.

குறிப்பாக வயநாடு மக்களவைத் தொகுதிக்குட்பட்ட சட்டசபை நிலவரம் குறித்து அவர் குறிப்பிடுகையில்: வயநாடு நாடாளுமன்றத் தொகுதிக்குட்பட்ட 7 சட்டமன்றத் தொகுதிகளிலும் காங்கிரஸ் கூட்டணி அமோக வெற்றி பெற்றுள்ளது."என்னுடன் சேர்த்து மொத்தம் 8 பிரதிநிதிகளும் (7 எம்.எல்.ஏக்கள் மற்றும் ஒரு எம்.பி) வயநாட்டின் ஒட்டுமொத்த வளர்ச்சிக்காக ஒன்றிணைந்து பாடுபடுவோம்," என்று அவர் நெகிழ்ச்சியுடன் குறிப்பிட்டுள்ளார்.

கடந்த பத்து ஆண்டுகளாக இடதுசாரி முன்னணி (LDF) ஆட்சியில் இருந்த கேரளாவில், தற்போது காங்கிரஸ் தலைமையிலான UDF ஆட்சியைப் பிடித்துள்ளதால் அக்கட்சியினர் உற்சாகத்தில் உள்ளனர். பிரியங்கா காந்தியின் இந்த நன்றி அறிவிப்பு, கேரள மக்கள் மத்தியில் மிகுந்த வரவேற்பைப் பெற்றுள்ளது.