தூத்துக்குடி மாநகராட்சியில் வரி உயர்வுக்கு எதிர்ப்பு : அதிமுக, திமுக கூட்டணி கட்சிகள் வெளிநடப்பு

தூத்துக்குடி மாநகராட்சி கூட்டத்தில் வரி உயர்வுக்கு எதிர்ப்பு தெரிவித்து அதிமுக மட்டுமின்றி திமுக கூட்டணி கட்சிகளும் வெளிநடப்பு செய்ததால் பரபரப்பு ஏற்பட்டது

தூத்துக்குடி மாநகராட்சி கூட்டம் மேயர் ஜெகன் பெரியசாமி தலைமையில் இன்று நடைபெற்றது. ஆணையா் லி.மதுபாலன், துணை மேயா் ஜெனிட்டா செல்வராஜ் ஆகியோா் முன்னிலை வகித்தனா். கூட்டத்தில் குடிதண்ணீர் கட்டணம் மற்றும் பாதாள சாக்கடை திட்டம் ஆகியவற்றிற்கான வரிகளை கடுமையாக உயர்த்தி தீர்மானம் வைக்கப்பட்டு இருந்தது. ஏற்கனவே தூத்துக்குடி மாநகராட்சியில் சொத்து வரி மற்றும் தொழில்வரி பல மடங்கு உயர்த்தப்பட்ட நிலையில் பொதுமக்கள் பாதிக்கப்பட்டு வந்தனர் மேலும் சொத்து வரி உயர்வுக்குப் பின் கட்டணம் செலுத்தாத பொதுமக்களுக்கு நோட்டீஸ் வழங்கக் கூடாது என்று மதுரை உயர் நீதிமன்றம் உத்தரவு பிறப்பித்துள்ளது

இந்நிலையில் தற்போது மீண்டும் மாநகராட்சி கூட்டத்தில் சாதாரண ஏழை எளிய மக்களை பாதிக்கும் வகையில் குடிநீர் கட்டணம் மற்றும் பாதாள சாக்கடை திட்டத்திற்கான வரிகள் உயர்த்தப்பட்டதற்கு எதிர்ப்பு தெரிவித்து அதிமுக எதிா்க்கட்சி கொறடாவும், 51 ஆவது வாா்டு மாமன்ற உறுப்பினருமான மந்திரமூா்த்தி, வெளிநடப்பு செய்தாா். அவருடன் ஜெயலட்சுமி, ஜெயராணி, பத்மாவதி, வெற்றிசெல்வன் ஆகியோரும் வெளிநடப்பு செய்தனா்.

இதற்கு விளக்கம் அளித்து மேயா் கூறியதாவது: வரி உயர்வு அனைைத்தும் அதிமுக ஆட்சி காலத்தில் விதிக்கப்பட்டது. தற்போது வரி உயர்வு பொதுமக்களை பாதிக்காத வகையில் அனைத்தும் சீர் செய்யப்பட்டுள்ளது. கடந்த 2006இல் கொண்டுவரப்பட்ட பாதாள சாக்கடை திட்டம் இதுவரை முறைப்படுத்தாமல் கிடப்பில் கிடந்தது. தற்போது திமுக ஆட்சி அமைந்தபின்னா் அதை முறைப்படுத்தி 60 சதவீத பணிகள் முடிக்கப்பட்டுள்ளன. 

மேலும், கடந்த 2011 அதிமுக ஆட்சியில் உயா்த்தப்பட்ட கட்டணத்தைத்தான் தற்போது நடைமுறைப்படுத்த உள்ளோம். ஆனால் நாங்கள் உயா்த்தியது போல் குற்றம் சுமத்துகின்றனா். பாதாள சாக்கடை வைப்புத் தொகையை 4 கட்டமாக கட்டுவதற்கான வாய்ப்பு வழங்கப்பட்டுள்ளது.