தொழிலாளர் உதவி ஆய்வாளருக்கு கொலை மிரட்டல் : தூத்துக்குடியில் அரசு ஊழியர் சங்கம் ஆர்ப்பாட்டம்!!

தூத்துக்குடியில் தொழிலாளர் உதவி ஆய்வாளருக்கு கொலை மிரட்டல் விடுத்தவர்கள் மீது நடவடிக்கை எடுக்க வலியுறுத்தி தமிழ்நாடு அரசு ஊழியர் சங்கம் சார்பில் ஆர்ப்பாட்டம் நடந்தது.

தூத்துக்குடி மூன்றாம் சரக தொழிலாளர் உதவி ஆய்வாளராக பணிபுரியும் பிரேம்குமார் என்பவரை அரசு பணி செய்தமைக்காக அவருக்கு அலைபேசி மூலம் கொலை மிரட்டல் விடுத்து அவரது வீட்டிற்கு சென்று அவரை தகாத வார்த்தைகளால் திட்டியும் அவரது வீட்டின் முன் நிறுத்தி வைத்திருந்த கார் கண்ணாடியை உடைத்து சென்றவர்கள் மீது நடவடிக்கை எடுத்து, அவருக்கும் அவரது குடும்பத்தினருக்கும் உயிர் பாதுகாப்பும் அவருக்கு பணி பாதுகாப்பு வழங்கிட கோரியும் தூத்துக்குடி ஒருங்கிணைந்த தொழிலாளர் துறை அலுவலகம் முன்பு ஆர்ப்பாட்டம் நடைபெற்றது.

ஆர்ப்பாட்டத்திற்கு மாவட்டத் தலைவர் சோ.மகேந்திரபிரபு தலைமை வகித்தார். மாவட்ட செயலாளர் ஜெ.உமாதேவி கோரிக்கை விளக்கவுரை ஆற்றினார். மேனாள் மாநில பொதுச்செயலாளர் என்.வெங்கடேசன் சிறப்புரை ஆற்றினார். தமிழ்நாடு அரசு ஊழியர் சங்கம் மாநில துணைத் தலைவர் தே.முருகன் வாழ்த்துரை வழங்கினார். மாநில பொதுச் செயலாளர் த.நா.தொ.துறை. சார்நிலை அலுவலர்கள் சங்கம் ம.கார்த்திகேயன் நிறைவுரை ஆற்றினார். மா. இ.செ சாம் டேனியல் நன்றியுரை ஆற்றினார். ஆர்ப்பாட்டத்தில் தமிழ்நாடு அரசு ஊழியர் சங்க நிர்வாகிகள் மற்றும் அனைத்து துறை தோழமை சங்க நிர்வாகிகள் கலந்து கொண்டனர்.