பொதுமக்களின் நீண்ட நாள் கனவு நிறைவேறியது: தூத்துக்குடி பூ மார்க்கெட் டாஸ்மாக் கடை மூடல்!

தூத்துக்குடி பூ மார்க்கெட் பகுதியில் செயல்பட்டு வந்த டாஸ்மாக் மதுபானக் கடை மூடப்பட்டதால் நீண்ட கோரிக்கை நிறைவேறியதாக அப்பகுதி பொதுமக்கள் திருஷ்டி சுற்றி உற்சாகமாகக் கொண்டாடியுள்ளனர்.

தூத்துக்குடி மாநகராட்சியின் 30-வது வார்டில் உள்ள முக்கிய வணிகப் பகுதியான பூ மார்க்கெட் வளாகத்தின் அருகே இந்த டாஸ்மாக் மதுபானக் கடை நீண்ட காலமாகச் செயல்பட்டு வந்தது. இக்கடையின் பெண் வியாபாரிகள், பொதுமக்கள், பள்ளி மற்றும் கல்லூரி மாணவ, மாணவிகள் கடுமையான இன்னல்களுக்கு ஆளாகி வந்தனர். மேலும், மதுப்பிரியர்களின் இடையூறுகளால் அப்பகுதியில் அடிக்கடி சட்டம்-ஒழுங்கு மற்றும் போக்குவரத்து நெரிசல் சார்ந்த பல்வேறு பிரச்சினைகள் ஏற்பட்டு வந்தன.

இதன் காரணமாக, இந்த மதுபானக் கடையை உடனடியாக இப்பகுதியிலிருந்து அப்புறப்படுத்த வேண்டும் என்று அப்பகுதி பொதுமக்கள், சமூக ஆர்வலர்கள் தொடர்ந்து கோரிக்கை விடுத்து வந்தனர். தற்போது பொதுமக்களின் நியாயமான கோரிக்கையினை ஏற்றுக்கொண்ட மாவட்ட நிர்வாகம் மற்றும் டாஸ்மாக் அதிகாரிகள், மதுபானக் கடையை அங்கிருந்து நிரந்தரமாக அப்புறப்படுத்த முறைப்படி உத்தரவிட்டனர். 

அதன்படி, இன்று அக்கடை அங்கிருந்து முழுமையாக காலி செய்யப்பட்டு, வேறு பகுதிக்கு மாற்றப்பட்டது. தங்கள் பகுதியின் மிக முக்கியப் பிரச்சைனைக்குத் தீர்வு கிடைத்து, நீண்ட நாள் கனவு நிறைவேறியதால் சமூக ஆர்வலர் நடிகர் காசிலிங்கம் தலைமையில் பொதுமக்கள், பெண்கள் மற்றும் வியாபாரிகள் கடையின் முன்பு பூசணிக்காய் மற்றும் தேங்காய் உடைத்து, கற்பூரம் ஏற்றித் திருஷ்டி சுற்றி தங்களின் மகிழ்ச்சியைப் வெளிப்படுத்தினர்.