பிளஸ்-1 பொதுத்தேர்வு ரத்து செய்ததற்கான அரசாணை வெளியீடு: மதிப்பெண் சான்றிதழ் நடைமுறை மாற்றம்!

பிளஸ்-1 பொதுத் தேர்வு ரத்துக்கான அரசாணை வெளியிடப்பட்டிருக்கிறது. அதில் மதிப்பெண் சான்றிதழ் வழங்கும் நடைமுறையையும் மாற்றி அறிவித்துள்ளது.

2017-18-ம் கல்வியாண்டு முதல் பிளஸ்-1 வகுப்புக்கு பொதுத்தேர்வு நடத்த அரசு உத்தரவிட்டு. அதன்படி, கடந்த கல்வியாண்டு வரை அதாவது 8 ஆண்டுகளாக பிளஸ்-1 வகுப்புக்கு பொதுத் தேர்வு நடந்தது. இந்த தேர்வை சுமார் 7 முதல் 8 லட்சம் வரையிலான மாணவ-மாணவிகள் எழுதி வந்தனர். இந்தநிலையில் தமிழ்நாடு மாநில கல்விக் கொள்கை-2025-ல், பிளஸ்-1 பொதுத் தேர்வு ரத்து செய்யப்படுவதாக அறிவிக்கப்பட்டு இருந்தது. இதனை செயல்படுத்தும் விதமாக தமிழ்நாடு அரசின் பள்ளிக்கல்வித் துறை அரசாணையாக அதை வெளியிட்டு இருக்கிறது.

இதுதொடர்பாக பள்ளிக்கல்வித் துறை முதன்மைச் செயலாளர் டாக்டர் பி.சந்திரமோகன் வெளியிட்டுள்ள அரசாணையில் கூறப்பட்டு இருப்பதாவது: 2025-26-ம் கல்வியாண்டு முதல் பிளஸ்-1 பொதுத் தேர்வு ரத்து செய்யப்படுகிறது. 2025-26-ம் கல்வியாண்டு முதல் பிளஸ்-1 வகுப்பில் படிக்கும் மாணவர்களுக்கு 2017-18-ம் கல்வியாண்டுக்கு முன்னர் இருந்த நடைமுறையை பின்பற்றி தேர்வு நடத்த அனுமதி வழங்கப்படுகிறது.

2025-26-ம் கல்வியாண்டில் இருந்து பிளஸ்-1 படிக்கும் மாணவர்களுக்கு ஒருங்கிணைந்த மதிப்பெண் சான்றிதழ் வழங்கும் முறையை மாற்றி, பிளஸ்-2 பொதுத் தேர்வு எழுதிய பின்னர் பிளஸ்-2 வகுப்பு மதிப்பெண்களை மட்டும் உள்ளடக்கிய மதிப்பெண் சான்றிதழ் வழங்கும் முறையை நடைமுறைப்படுத்த அரசு தேர்வுகள் இயக்குனருக்கு அனுமதி வழங்கப்படுகிறது. 

மேலும் ஏற்கனவே பிளஸ்-1 வகுப்பு பொதுத் தேர்வில் தோல்வியுற்ற மாணவர்களுக்கு மட்டும் பிளஸ்-1 வகுப்பு பொதுத் தேர்வினை அடுத்த 5 ஆண்டுகளுக்கு அதாவது, மார்ச் 2030 வரையில் தொடர்ந்து நடத்த அரசு தேர்வுகள் இயக்குனருக்கு அனுமதி வழங்கப்படுகிறது. இவ்வாறு அதில் தெரிவிக்கப்பட்டு உள்ளது.