முதல்வர் ஸ்டாலின் வெற்றிக்கு எதிரான மேல்முறையீடு ‍: தேதி குறிப்பிடாமல் தீர்ப்பு தள்ளிவைப்பு

கடந்த 2011-ம் ஆண்டு தமிழக சட்டப்பேரவைத் தேர்தலின் போது கொளத்தூர் தொகுதியில் திமுக சார்பில் போட்டியிட்ட மு.க.ஸ்டாலின் வெற்றி பெற்றதை எதிர்த்து தொடரப்பட்ட வழக்கில், உச்ச நீதிமன்றம் தனது தீர்ப்பைத் தேதி குறிப்பிடாமல் தள்ளிவைத்துள்ளது.

2011 சட்டப்பேரவைத் தேர்தலில் கொளத்தூர் தொகுதியில் மு.க.ஸ்டாலினை எதிர்த்து அதிமுக சார்பில் போட்டியிட்ட சைதை துரைசாமி, இந்தத் தேர்தல் வெற்றியை எதிர்த்து வழக்கு தொடர்ந்தார். தனது மனுவில் அவர் குறிப்பிட்டிருந்ததாவது: தேர்தல் ஆணையம் நிர்ணயித்த தொகையை விட மு.க.ஸ்டாலின் கூடுதலாகச் செலவு செய்துள்ளார்.

அதிகார துஷ்பிரயோகத்தில் ஈடுபட்டு வெற்றி பெற்றுள்ளார். எனவே, அவரது வெற்றியைச் செல்லாது என அறிவிக்க வேண்டும். இந்த வழக்கை ஏற்கனவே விசாரித்த சென்னை உயர் நீதிமன்றம், சைதை துரைசாமியின் மனுவைத் தள்ளுபடி செய்திருந்தது. இதனை எதிர்த்து அவர் உச்ச நீதிமன்றத்தில் மேல்முறையீடு செய்தார்.

நீதிபதிகள் ஜே.கே.மகேஸ்வரி, விஜய் பிஷ்னோய் ஆகியோர் அடங்கிய அமர்வு நேற்று இந்த மனுவை விசாரித்தது.

தமிழக முதல்வர் தரப்பு வாதம்: முதல்வர் மு.க.ஸ்டாலின் சார்பில் ஆஜரான மூத்த வழக்கறிஞர் கபில் சிபல் வாதிடுகையில், "மனுதாரர் சுமத்தும் குற்றச்சாட்டுகளுக்கு எவ்வித ஆதாரமும் இல்லை. வாக்காளர்களுக்குப் பணம் விநியோகம் செய்யப்பட்டதாகக் கூறப்படும் புகாரைச் சந்தேகத்திற்கு இடமின்றி நிரூபிக்கத் தவறிவிட்டனர். இதனைச் சரியாக ஆய்வு செய்தே உயர் நீதிமன்றம் இந்த மனுவைத் தள்ளுபடி செய்தது," என்று குறிப்பிட்டார்.

சைதை துரைசாமி தரப்பு வாதம்: மனுதாரர் தரப்பில் ஆஜரான மூத்த வழக்கறிஞர் டி.எஸ்.நாயுடு, "கொளத்தூர் தொகுதியில் வாக்காளர்களுக்கு நவீன முறையில் பணப்பட்டுவாடா செய்யப்பட்டதற்கான ஆதாரங்கள் எங்களிடம் உள்ளன. எனவே, உயர் நீதிமன்றத்தின் தீர்ப்பை ரத்து செய்ய வேண்டும்," என்று வாதிட்டார்.

நீதிமன்றத்தின் உத்தரவு: இரு தரப்பு வாதங்களையும் கேட்ட நீதிபதிகள் அமர்வு, இந்த வழக்கின் இறுதித் தீர்ப்பைத் தேதி குறிப்பிடாமல் தள்ளிவைத்தது. மேலும், வாதங்களை வலுப்படுத்தும் வகையில் இரு தரப்பினரும் தங்களது எழுத்துப்பூர்வமான வாதங்களை வரும் புதன்கிழமைக்குள் தாக்கல் செய்ய வேண்டும் என்றும் உத்தரவிட்டது.