18-ம் நூற்றாண்டில் நடக்கும் கதை.. தங்கலான் விமர்சனம்!

வட ஆற்காடு பகுதியில் உள்ள ஒரு கிராமத்தில் மனைவி பார்வதி மற்றும் குழந்தைகளுடன் வசிக்கும் பூர்வக்குடியை சேர்ந்த விக்ரம், தனது குழுவினருடன் விவசாயம் செய்து பிழைப்பு நடத்துகிறார். அவர்களின் நிலம் ஜமீன்தாரின் சூழ்ச்சியால் அபகரிக்கப்படுகிறது.

இந்த நிலையில் கோலர் பகுதியில் தங்கம் இருப்பதை அறியும் கிளெமென்ட் என்ற வெள்ளைக்காரர், விக்ரமையும் அவரது குழுவினரையும் அணுகி தங்கத்தை எடுத்து தந்தால் அதில் பங்கு தருவதாக உறுதி அளிக்கிறார். அதை ஏற்கும் விக்ரம் தனது கூட்டத்தில் உள்ள சிலரை அழைத்துக் கொண்டு வெள்ளைக்காரர்களுடன் பறப்படுகிறார். வழியில் அவர்களுக்கு ஏற்படும் தடங்கல்களும் அதை மீறி தங்கத்தை எடுக்க முடிந்ததா? என்பதும் மீதி கதை.

பழங்குடி இனத்தவராக வரும் விக்ரம், இப்படியும் நடிக்க முடியுமா என்று வியக்கும் வகையில் கதாபாத்திரத்தில் அபார உழைப்பை கொடுத்து மகா கலைஞனாக வாழ்ந்து இருக்கிறார். சண்டை காட்சிகளில் பாய்ச்சல் காட்டுகிறார். புலியுடன் மோதுவதில் மிரட்சி. நடை, உடை, பாவனை என்று அத்தனையிலும் இதுவரை பார்த்திராத வித்தியாசமான தோற்றத்தில் உடலை வருத்தி விருதுக்குரிய நடிப்பை வழங்கி இருக்கிறார்.விக்ரம் மனைவியாக வரும் பார்வதி ரவிக்கை அணியாத பழங்குடி பெண் வேடத்தில் யதார்த்தமான நடிப்பை அள்ளி கொட்டி இருக்கிறார். காதல் காட்சிகளிலும் அரிதாரம் பூசாத அழகு காட்டுகிறார்.

சூனியக்காரியாக திகிலூட்டுகிறார் மாளவிகா மோகனன்.. சுற்றி சுழன்று சண்டை போட்டு ஹாலிவுட் அதிரடி ஹீரோயின்களுக்கு சவால் விட்டு இருக்கிறார். விக்ரமுடன் அவர் மோதும் காட்சி மிரள வைக்கிறது. பசுபதி அனுபவ நடிப்பை வழங்கி இருக்கிறார். வெள்ளைக்காரராக வரும் டேனியல் கொல்டாஜிரோனின் இன்னொரு முகம் அதிர வைக்கிறது. ஜி.வி.பிரகாஷின் இசையில் பாடல்களில் உயிர்ப்பு. கதையோடு பயணிக்கும் பின்னணி இசையும் போர்முரசமாய் ஒலித்து படத்தை தூக்கி நிறுத்துகிறது.

கிஷோர் குமாரின் கேமரா பழங்குடி மக்களின் வறட்சியான நிலம், தங்க வயல் என்று அந்த காலத்துக்கே அழைத்து சென்று கண்களுக்கு விருந்து படைக்கிறது. பிற்பகுதியில் சில காட்சிகள் அழுத்தம் இல்லாமல் நகர்ந்து போவது பலகீனம். பூர்வக்குடி மக்கள் மீதான அடக்குமுறை. நிலம் மீதான அரசியல் போன்றவற்றை வரலாற்று பின்னணியில் பிரமாண்டமாக காட்சிப்படுத்தி தரமான படைப்பாக கொடுத்து இருக்கிறார் இயக்குனர் பா.ரஞ்சித்.