நாடு முழுவதும் டிஜிட்டல் பணப் பரிவர்த்தனையை முறைப்படுத்தும் வகையில், தேர்ந்தெடுக்கப்பட்ட குறிப்பிட்ட வணிகப் பிரிவுகளுக்கான யு.பி.ஐ. பரிவர்த்தனைகளுக்குக் கட்டணம் நிர்ணயம் செய்து மத்திய நிதி அமைச்சகம் புதிய விதிமுறைகளை வெளியிட்டுள்ளது. இப் புதிய நடைமுறை வரும் அக்டோபர் 15-ஆம் தேதி முதல் அமலுக்கு வரவுள்ளது.
புதிய கட்டண வரம்புகள் என்னென்ன?
சாதாரண நபர்களிடையே பரிவர்த்தனை: தனிநபர்களுக்கு இடையேயான (P2P) டிஜிட்டல் பரிவர்த்தனைகளுக்கு எவ்வித கட்டணமும் கிடையாது; வழக்கம் போல் இலவசமாகவே தொடரும்.
ரூ.2,000 வரையிலான பரிவர்த்தனைகள்: கடைகளில் செய்யப்படும் ரூ.2,000 வரையிலான சிறிய அளவிலான பரிவர்த்தனைகளுக்கு எந்தக் கட்டணமும் விதிக்கப்படாது. யு.பி.ஐ. பரிவர்த்தனைகளில் 95 சதவீதத்திற்கும் அதிகமானவை இவ்வகை சிறிய தொகைகளே என்பதால், பொதுமக்கள் இதனால் எந்தவிதக் கூடுதல் கட்டணச் சுமையையும் சந்திக்க மாட்டார்கள்.
ரூ.2,000-க்கு மேற்பட்ட வர்த்தகப் பரிவர்த்தனைகள்: ரயில்வே, தொலைத்தொடர்பு சேவைகள், காப்பீடு மற்றும் எரிபொருள் போன்ற குறிப்பிட்ட வணிகப் பிரிவுகளில் ரூ.2,000-க்கு மேல் மேற்கொள்ளப்படும் பரிவர்த்தனைகளுக்கு 0.4% வரை வணிகக் கட்டணம் விதிக்கப்படும்.
சலுகைக் கட்டணம் & அதிகபட்ச வரம்பு: குறிப்பிடப்பட்ட சில அத்தியாவசிய வணிகப் பிரிவுகளில் ரூ.2,000-க்கு மேற்பட்ட பரிவர்த்தனைக்கு ரூ.5 சலுகைக் கட்டணம் நிர்ணயிக்கப்பட்டுள்ளது. மேலும், ஒரு பரிவர்த்தனைக்கான அதிகபட்ச வணிகக் கட்டணமாக ரூ.300 வரை மட்டுமே வசூலிக்கப்படும்.
பொதுமக்களுக்குக் கட்டணச் சுமை உண்டா?
இப் புதிய கட்டண முறையானது வாடிக்கையாளர்களின் சொந்தக் கணக்கில் இருந்து வசூலிக்கப்பட மாட்டாது. இது முழுக்க முழுக்க வணிகர்களைச் (Merchant Discount Rate) சார்ந்த கட்டணம் என்பதால், சாதாரண மற்றும் நடுத்தரப் பொதுமக்கள் தொடர்ந்து இலவசமாகவே யு.பி.ஐ. சேவையைப் பயன்படுத்தலாம் என நிதி அமைச்சகம் தெளிவுபடுத்தியுள்ளது.