புனேயில் 4 வயது சிறுமி பாலியல் வன்கொடுமை செய்து கொலை: 65 வயது முதியவர் கைது!

புனேயில்  4 வயது சிறுமி பாலியல் வன்கொடுமை செய்யப்பட்டு, படுகொலை செய்யப்பட்ட சம்பவம் பெரும் அதிர்வலைகளை ஏற்படுத்தியுள்ளது. இக்குற்றச்சாட்டின் கீழ் 65 வயது நபரை போலீஸார் கைது செய்துள்ளனர்.

மகாராஷ்டிர மாநிலம்புனே மாவட்டம் போர் தாலுகாவில் உள்ள ஒரு கிராமத்தில் வெள்ளிக்கிழமை இச்சம்பவம் நிகழ்ந்துள்ளது. கைதான முதியவர், அந்தச் சிறுமிக்கு உணவு தருவதாக ஆசைவார்த்தை கூறி அருகில் இருந்த ஒரு மாட்டுத் தொழுவத்திற்கு அழைத்துச் சென்றுள்ளார். அங்குச் சிறுமியைப் பாலியல் வன்கொடுமை செய்து, பின்னர் கொடூரமாகக் கொலை செய்ததாகப் போலீஸார் தரப்பில் தெரிவிக்கப்பட்டுள்ளது.

சிறுமியைக் காணவில்லை என உறவினர்கள் தேடத் தொடங்கியபோது, அங்கிருந்த ஒரு வீட்டின் சிசிடிவி  கேமராவில் அந்த முதியவர் சிறுமியுடன் செல்வது பதிவாகியிருந்தது. இதனை ஆதாரமாகக் கொண்டு போலீஸார் அவரைக் கைது செய்தனர். இந்தச் சம்பவம் காட்டுத்தீயாகப் பரவிய நிலையில், ஆத்திரமடைந்த நூற்றுக்கணக்கான கிராம மக்கள் காவல் நிலையத்தை முற்றுகையிட்டனர். மேலும், மும்பை - பெங்களூரு நெடுஞ்சாலையில் மறியலில் ஈடுபட்டனர்.

நிலைமையைக் கட்டுக்குள் கொண்டு வந்த புனே (ஊரக) எஸ்பி சந்தீப் சிங் கில், "இந்த வழக்கில் 15 நாட்களுக்குள் குற்றப்பத்திரிகை தாக்கல் செய்யப்படும் என்றும், வழக்கு விரைவு நீதிமன்றத்தில் (Fast-track court) விசாரிக்கப்படும்" என்றும் உறுதி அளித்தார். கைதான நபர் மீது ஏற்கனவே 1998 மற்றும் 2015-ம் ஆண்டுகளில் குற்ற வழக்குகள் இருந்ததும் விசாரணையில் தெரியவந்துள்ளது.