ஹார்முஸ் ஜலசந்தியில் போர் நிறுத்தம்? - ஈரானுடன் ஒப்பந்தம் செய்யத் தயாராகும் டிரம்ப்..!

ஈரானுடன் இறுதி அமைதி ஒப்பந்தத்தை எட்டுவதில் பெரும் முன்னேற்றம் ஏற்பட்டுள்ளதாகவும், இதன் காரணமாக ஹார்முஸ் ஜலசந்தியில் கப்பல்களை வழிநடத்தும் 'புராஜெக்ட் ப்ரீடம்' திட்டம் தற்காலிகமாக நிறுத்தி வைக்கப்படுவதாகவும் அமெரிக்க அதிபர் டொனால்ட் டிரம்ப் தெரிவித்துள்ளார்.

இது குறித்து அதிபர் டிரம்ப் தனது சமூக வலைதளப் பதிவில் குறிப்பிட்டதாவது:     "பாகிஸ்தான் மற்றும் பிற நாடுகளின் வேண்டுகோளுக்கு இணங்கவும், ஈரானுக்கு எதிரான ராணுவ நடவடிக்கைகளில் நாம் பெற்ற மிகப்பெரிய வெற்றியின் அடிப்படையிலும், ஒரு முழுமையான ஒப்பந்தத்தை எட்டுவதில் பெரும் முன்னேற்றம் ஏற்பட்டுள்ளது. ஈரானின் பிரதிநிதிகளுடன் பரஸ்பரம் பல விஷயங்களில் உடன்பாடு காணப்பட்டுள்ளது."

ஹார்முஸ் ஜலசந்தி வழியாகச் சிக்கியுள்ள வணிகக் கப்பல்களைப் பாதுகாப்பாக வெளியேற்ற மே 4-ஆம் தேதி 'புராஜெக்ட் ப்ரீடம்' என்ற திட்டத்தை அமெரிக்கா தொடங்கியது. தற்போது பேச்சுவார்த்தையில் முன்னேற்றம் ஏற்பட்டுள்ளதால், இந்த நடவடிக்கையைச் சிறிது காலத்திற்கு நிறுத்தி வைப்பதாக டிரம்ப் அறிவித்துள்ளார். எனினும், ஈரான் மீதான பொருளாதாரத் தடைகளும், கடற்படை முற்றுகையும் (Naval Blockade) முழு வீச்சில் தொடரும் என்பதை அவர் தெளிவுபடுத்தியுள்ளார்.

பேச்சுவார்த்தைகள் ஒருபுறம் நடந்தாலும், ஈரான் தனது அத்துமீறல்களை நிறுத்த வேண்டும் என டிரம்ப் எச்சரித்துள்ளார். "அமெரிக்கக் கப்பல்கள் அல்லது சொத்துக்கள் மீது ஈரான் தாக்குதல் நடத்தினால், அந்த நாடு பூமியில் இருந்தே துடைத்தெறியப்படும்" என்று அவர் தனது வழக்கமான பாணியில் கடும் எச்சரிக்கை விடுத்துள்ளார்.

கடந்த பிப்ரவரி 28, 2026 அன்று தொடங்கிய அமெரிக்க - ஈரான் போர், உலக அளவில் பெரும் பொருளாதாரப் பாதிப்பை ஏற்படுத்தியுள்ளது. பாகிஸ்தான் பிரதமர் ஷெபாஸ் ஷெரீப் மற்றும் ராணுவத் தளபதி ஆசிம் முனீர் ஆகியோரின் முயற்சியால் இஸ்லாமாபாத்தில் அமைதிப் பேச்சுவார்த்தைகள் நடைபெற்று வருகின்றன. ஈரான் தனது செறிவூட்டப்பட்ட யுரேனியத்தை ஒப்படைக்கச் சம்மதித்துள்ளதாகக் கூறப்படும் நிலையில், இந்த ஒப்பந்தம் கையெழுத்தானால் அது உலகளாவிய எரிசக்தி விநியோகத்திற்குப் பெரும் நிம்மதியைத் தரும்.