கோஷ்டி மோதல்: யூடியூபர் ஜி.பி.முத்து உள்ளிட்ட 11 பேர் மீது வழக்குப் பதிவு!

உடன்குடியில் முள்செடி அகற்றுவது தொடர்பாக ஏற்பட்ட மோதலில், பிரபல யூடியூபர் ஜி.பி.முத்து மற்றும் அவரது குடும்பத்தினர் உட்பட இருதரப்பைச் சேர்ந்த 11 பேர் மீது போலீசார் வழக்குப் பதிவு செய்துள்ளனர்.

தூத்துக்குடி மாவட்டம் உடன்குடி பரதர் தெருவைச் சேர்ந்த நகை தொழிலாளி சுடலையாண்டி (44), தனது மகளை டியூஷன் சென்டருக்கு அழைத்துச் சென்றபோது, பாதையோரம் இருந்த முள்செடி அவர் மகளின் கண்ணில் குத்தி காயம் ஏற்பட்டுள்ளது. அந்த முள்செடி ஜி.பி.முத்துவின் வீட்டின் முன்பு வளர்க்கப்பட்டு வந்ததாகக் கூறப்படுகிறது. இதனால் ஆத்திரமடைந்த சுடலையாண்டி, அந்த முள்செடியை அகற்றியுள்ளார்.

மறுநாள் காலை அந்த வழியாகச் சென்ற சுடலையாண்டியிடம், "எங்கள் வீட்டு முள்செடியை எப்படி அகற்றலாம்?" எனக் கேட்டு ஜி.பி.முத்து, அவரது மனைவி அஜிதா, தந்தை கணேசன் உள்ளிட்டோர் வாக்குவாதத்தில் ஈடுபட்டுள்ளனர். இதில் இருதரப்புக்கும் இடையே கைகலப்பு ஏற்பட்டு, ஒருவரை ஒருவர் கடுமையாகத் தாக்கிக்கொண்டனர். இதில் பலருக்குக் காயம் ஏற்பட்டுள்ளது.

இந்த மோதல் குறித்து சுடலையாண்டி மற்றும் ஜி.பி.முத்து தரப்பில் தனித்தனியாகக் குலசேகரன்பட்டினம் காவல் நிலையத்தில் புகார் அளிக்கப்பட்டது. அதன்பேரில், யூடியூபர் ஜி.பி.முத்து உட்பட மொத்தம் 11 பேர் மீது போலீசார் வழக்குப் பதிவு செய்து விசாரணை நடத்தி வருகின்றனர். இதற்கிடையே, இருதரப்பினரும் தெருவில் மோதிக்கொள்ளும் வீடியோ காட்சிகள் சமூக வலைதளங்களில் வெளியாகிப் பெரும் பரபரப்பை ஏற்படுத்தியுள்ளது.