பைக்குகள் மீது கார் மோதி 2 பேர் உயிரிழப்பு: போட்டித் தேர்வு பயிற்சி மையத்திற்குச் சென்றபோது சோகம்!

தென்காசி மாவட்டம் சங்கரன்கோவில் அருகே இரண்டு இருசக்கர வாகனங்கள் மீது கார் மோதிய விபத்தில் பள்ளி ஆசிரியர் மற்றும் கல்லூரி மாணவி சிகிச்சை பலனின்றி உயிரிழந்தனர். மேலும் கணவன், மனைவி உள்பட மூன்று பேர் படுகாயமடைந்து தீவிர சிகிச்சை பெற்று வருகின்றனர்.

விருதுநகர் மாவட்டம் ஸ்ரீவில்லிபுத்தூரைச் சேர்ந்தவர் மாரியப்பன் மகன் பரமசிவன் (40). இவர் அப்பகுதியில் உள்ள மங்காபுரம் இந்து நடுநிலைப்பள்ளியில் ஆசிரியராகப் பணியாற்றி வந்தார். இவரது நண்பர் ஸ்ரீவில்லிபுத்தூரைச் சேர்ந்த கூலித் தொழிலாளி இசக்கிதுரை மகன் பரமசிவன் (44). இவர்கள் இருவரும் தங்களது உறவினர்களான கல்லூரி மாணவிகளை அரசு போட்டித் தேர்வுகளுக்குத் தயார் செய்வதற்காக, சங்கரன்கோவிலில் உள்ள ஒரு தனியார் பயிற்சி மையத்தில் சேர்க்க ஏற்பாடு செய்திருந்தனர்.

இதற்காக நேற்று ஆசிரியர் பரமசிவன் தனது இருசக்கர வாகனத்தில் உறவினரான முருகனின் மகள் செல்வபாரதி (20) என்ற கல்லூரி மாணவியை அழைத்துக்கொண்டு சங்கரன்கோவிலுக்குப் புறப்பட்டார். அதேபோன்று தொழிலாளி பரமசிவன் மற்றொரு பைக்கில் தனது மனைவி பொன்கிளி (42) மற்றும் உறவினரான கோவிந்தன் மகள் சந்தியா (20) ஆகியோரை அழைத்துக்கொண்டு பின்னால் சென்றுள்ளார். இரண்டு வாகனங்களும் அடுத்தடுத்து சென்று கொண்டிருந்தன.

சங்கரன்கோவில் அருகே பருவக்குடி முக்கு ரோடு பகுதியில் சென்றபோது, அந்த வழியாக வந்த கார் ஒன்று எதிர்பாராதவிதமாக இரண்டு இருசக்கர வாகனங்களின் மீதும் நேருக்கு நேர் அடுத்தடுத்து பயங்கரமாக மோதியது.

இந்த விபத்தில் படுகாயமடைந்த ஐந்து பேரையும் அப்பகுதியினர் மீட்டு 108 ஆம்புலன்ஸ் மூலம் சிகிச்சைக்காகச் சங்கரன்கோவில் அரசு மருத்துவமனையில் அனுமதித்தனர். எனினும் அங்கு தீவிர சிகிச்சை பலனின்றி ஆசிரியர் பரமசிவன் மற்றும் மாணவி செல்வபாரதி ஆகிய இருவரும் அடுத்தடுத்து உயிரிழந்தனர். தொழிலாளி பரமசிவன், அவரது மனைவி பொன்கிளி, மாணவி சந்தியா ஆகிய மூன்று பேருக்குத் தீவிர சிகிச்சை அளிக்கப்பட்டு வருகிறது.

இச்சம்பவம் குறித்துக் கரிவலம்வந்தநல்லூர் போலீசார் வழக்குப் பதிவு செய்து, விபத்தை ஏற்படுத்திய காரை ஓட்டி வந்த தேனி மாவட்டம் வடுகபட்டியைச் சேர்ந்த முத்துராமன் மகன் கணேசன் (35) என்பவரைக் கைது செய்து தீவிர விசாரணை நடத்தி வருகின்றனர்.