குடும்பக்கட்டுப்பாடு செய்த பெண் கர்ப்பம்: ரூ.60 ஆயிரம் இழப்பீடு வழங்க நீதிமன்றம் உத்தரவு

குடும்பக்கட்டுப்பாடு அறுவை சிகிச்சை செய்த பெண் மீண்டும் கர்ப்பம் அடைந்த நிலையில் ரூ.60 ஆயிரம் இழப்பீடு வழங்க உயர்நீதிமன்றம் உத்தரவிட்டது.

தூத்துக்குடி மாவட்டத்தைச் சேர்ந்த ராஜாசுப்பிரமணியன், மதுரை ஐகோர்ட்டில் தாக்கல் செய்த மனுவில், எனது மனைவிக்கு தூத்துக்குடி அரசு மருத்துவமனையில் குடும்பக்கட்டுப்பாடு ஆபரேஷன் செய்தோம். ஆனால் அவருக்கு இந்த ஆபரேஷனை டாக்டர்கள் முறையாக செய்யவில்லை. இதனால் அவர் மீண்டும் கர்ப்பிணி ஆனார். எனவே கவனக்குறைவாக செயல்பட்ட அரசு மருத்துவமனை டாக்டர் உரிய இழப்பீட்டை வழங்க உத்தரவிட வேண்டும் என கூறியிருந்தார்.

இந்த வழக்கு நீதிபதி லட்சுமி நாராயணன் முன்பு விசாரணைக்கு வந்தது. அப்போது தூத்துக்குடி மருத்துவமனை டாக்டர் சார்பில் ஆஜரான வக்கீல், சில பெண்களுக்கு குடும்ப கட்டுப்பாடு ஆபரேஷன் செய்த பின்பு கருப்பை குழாய் மீண்டும் வளர்ந்துவிடும். இதனால் மீண்டும் கருவுற வாய்ப்பு உள்ளது. இதற்கு ஆபரேஷனை குறை கூற இயலாது என வாதாடினார்.

விசாரணை முடிவில். கருத்தடை சிகிச்சை தோல்வியுறும்போது இழப்பீடாக ரூ.60 ஆயிரம் வழங்க வேண்டும் என அரசாணை பிறப்பிக்கப்பட்டு உள்ளது. அந்த தொகையை பெற மனுதாரர் குடும்பத்தினருக்கு தகுதி உள்ளது. எனவே ரூ.60 ஆயிரம் இழப்பீட்டு தொகையை மனுதாரருக்கு 2 வாரத்தில் வழங்க வேண்டும் என நீதிபதி உத்தரவிட்டு வழக்கை முடித்து வைத்தார்.