கூட்டணி குறித்து யாரிடமும் பேசவில்லை; வதந்திகளை நம்பாதீர்: தவெக திட்டவட்டம்!

கூட்டணி குறித்து யாரிடமும் பேசவில்லை, திட்டமிட்டுப் பரப்பப்படும் வதந்திகளை நம்ப வேண்டாம்" என தமிழக வெற்றிக் கழகம் விளக்கம் அளித்துள்ளது. 

தமிழக சட்டமன்றத் தேர்தல் நெருங்கி வரும் வேளையில், கூட்டணி குறித்துப் பரவி வரும் தகவல்களுக்குத் தமிழக வெற்றிக் கழகம் (தவெக) முற்றுப்புள்ளி வைத்துள்ளது. "கூட்டணி குறித்து யாரிடமும் பேசவில்லை, திட்டமிட்டுப் பரப்பப்படும் வதந்திகளை நம்ப வேண்டாம்" என அக்கட்சியின் இணைப் பொதுச் செயலாளர் சி.டி.ஆர். நிர்மல் குமார் தெரிவித்துள்ளார்.

அடுத்த மாதம் 23-ஆம் தேதி தேர்தல் நடைபெறவுள்ள நிலையில், தவெக தனித்துக் களம் காண முடிவு செய்துள்ளது. எனினும், தேசிய ஜனநாயகக் கூட்டணியில் தவெக இணையப் போவதாகவும், விஜய்க்கு முக்கியப் பதவிகள் வழங்கப்பட உள்ளதாகவும் சமூக வலைதளங்களில் தகவல்கள் உலா வந்தன.

இதற்குப் பதிலடி கொடுக்கும் வகையில் சி.டி.ஆர். நிர்மல் குமார் தனது ‘எக்ஸ்’ (X) தளத்தில் பதிவிட்டுள்ளதாவது: "சமீபகாலமாக சில ஊடகங்களிலும், சமூக வலைதளங்களிலும் அரசியல் லாபத்திற்காகப் பொய்யான செய்திகள் பரப்பப்பட்டு வருகின்றன. குறிப்பாக, பாஜக, அஇஅதிமுக, சசிகலா அல்லது மருத்துவர் ராமதாஸ் ஆகியோருடன் தவெக கூட்டணி பேச்சுவார்த்தை நடத்துவதாகக் கூறப்படும் தகவல்கள் முற்றிலும் உண்மைக்குப் புறம்பானவை. எந்த மட்டத்திலும், எந்தக் கட்சியுடனும் பேச்சுவார்த்தை நடைபெறவில்லை என்பதைத் திட்டவட்டமாகத் தெரிவித்துக் கொள்கிறோம்."

"இதேபோன்ற பொய்ச் செய்திகள் கடந்த காலங்களில் காங்கிரஸ் கட்சியுடனும் தொடர்புபடுத்திப் பரப்பப்பட்டன. பொதுமக்களிடையேயும், தொண்டர்களிடையேயும் குழப்பத்தை விளைவிப்பதற்காகவே இத்தகைய ஆதாரமற்ற செய்திகள் திமுகவினரால் திட்டமிட்டுப் பரப்பப்படுகின்றன. பொறுப்புள்ள ஊடகங்கள் செய்தியின் உண்மைத்தன்மையை ஆராயாமல் வதந்திகளைப் பகிர வேண்டாம்," என அவர் கேட்டுக்கொண்டுள்ளார்.

'வாய்மையே வெல்லும்' என்ற முழக்கத்துடன் இந்தப் பதிவு வெளியிடப்பட்டுள்ளது, இதன் மூலம் தவெக தனது தனித்துவமான நிலைப்பாட்டை மீண்டும் உறுதிப்படுத்தியுள்ளது.