கில், வாஷிங்டன் சுந்தர், ஜடேஜா அபார சதம்: சரிவில் இருந்து மீண்டு டிரா செய்தது இந்தியா!

311 ரன் பின்தங்கிய நிலையில் 2-வது இன்னிங்சை தொடங்கிய இந்திய அணியின் தொடக்க ஆட்டக்காரர் யஷஸ்வி ஜெய்ஸ்வால் (0), அடுத்து களம் கண்ட சாய் சுதர்சன் (0) ஆகியோர் கிறிஸ் வோக்ஸ் பந்து வீச்சில் முதல் ஓவரிலேயே விக்கெட்டை பறிகொடுத்து அதிர்ச்சி அளித்தாலும், மற்றொரு தொடக்க ஆட்டக்காரர் லோகேஷ் ராகுல், கேப்டன் சுப்மன் கில் ஆகியோர் நிதானமாக ஆடி அணியை சரிவில் இருந்து காப்பாற்றினர். 4-வது நாள் முடிவில் இந்திய அணி 63 ஓவர்களில் 2 விக்கெட்டுக்கு 174 ரன்கள் எடுத்து இருந்தது. ஜெய்ஸ்வால் 87 ரன்களுடனும், சுப்மன் கில் 78 ரன்களுடனும் களத்தில் இருந்தனர்.

நேற்று 5-வது மற்றும் கடைசி நாள் ஆட்டம் நடந்தது. மேலும் 137 ரன்கள் எடுத்தால் இன்னிங்ஸ் தோல்வியை தவிர்க்க முடியும் என்ற இக்கட்டான நிலையில் லோகேஷ் ராகுல், சும்பன் கில் தொடர்ந்து பேட் செய்தனர். இருவரும் பொறுமையான ஆட்டத்தை தொடர்ந்தனர். லோகேஷ் ராகுல் 90 ரன்னில் (230 பந்து, 8 பவுண்டரி) பென் ஸ்டோக்ஸ் பந்து வீச்சில் எல்.பி.டபிள்யூ. முறையில் ஆட்டமிழந்து வெளியேறினார். 3-வது விக்கெட்டுக்கு லோகேஷ் ராகுல்-சுப்மன் கில் இணை 186 ரன்கள் திரட்டியது.

இதைத்தொடர்ந்து வாஷிங்டன் சுந்தர் வந்தார். நிலைத்து நின்று ஆடிய கேப்டன் சுப்மன் கில் 228 பந்துகளில் தனது 9-வது சதத்தை எட்டினார். நடப்பு தொடரில் அவர் அடித்த 4-வது சதம் இதுவாகும். முன்னதாக அவர் 81 ரன்னில் இருக்கையில் கேட்ச் வாய்ப்பில் இருந்து தப்பினார். சதம் அடித்த சற்று நேரத்தில் கேப்டன் சுப்மன் கில் (103 ரன், 238 பந்து, 12 பவுண்டரி) ஜோப்ரா ஆர்ச்சர் பந்து வீச்சை திருப்ப முயற்சித்து விக்கெட் கீப்பர் ஜேமி சுமித்திடம் சிக்கினார்.

அடுத்து ரவீந்திர ஜடேஜா, வாஷிங்டன் சுந்தருடன் சேர்ந்தார். இருவரும் விக்கெட்டை இழந்து விடக்கூடாது என்ற நோக்குடன் நிதானமான ஆட்டத்தை கடைப்பிடித்தனர். அதேநேரத்தில் ஏதுவான பந்துகளை எல்லைக்கோட்டுக்கும் ஓடவிட்டனர். பென் ஸ்டோக்ஸ் வீசிய ஒரு ஓவரில் (அதாவது 112-வது ஓவர்) வாஷிங்டன் சுந்தர் தொடர்ச்சியாக ஒரு சிக்சர், ஒரு பவுண்டரி விளாசி அரைசதத்தை (117 பந்துகளில்) கடந்தார். 

அவர் அடித்த 5-வது அரைசதம் இதுவாகும். அதேஓவரில் ரவீந்திர ஜடேஜா பவுண்டரி விரட்டி அரைசதத்தை (86 பந்தில்) எட்டினார். அத்துடன் அணியும் முன்னிலை பெற்றது. நடப்பு தொடரில் அவர் விளாசிய 5-வது அரைசதமாகவும், ஒட்டுமொத்தத்தில் 27-வது அரைசதமாகவும் இது அமைந்தது. அவர் முதல் பந்திலேயே கேட்ச் கண்டத்தில் இருந்து தப்பிப்பிழைத்ததால் கிட்டிய வாய்ப்பை சரியாக பயன்படுத்தி கொண்டார்.

123 ஓவர்கள் முடிந்திருந்த போது இந்திய அணி 4 விக்கெட்டுக்கு 343 ரன்கள் எடுத்து 32 ரன்கள் முன்னிலை பெற்று இருந்தது. வாஷிங்டன் 66 ரன்களுடனும், ரவீந்திர ஜடேஜா 64 ரன்களுடனும் ஆடிக்கொண்டிருந்தனர். இந்த ஆட்டம் டிராவை நோக்கி நகர்ந்தது.

கடைசி செஷனில் 15 ஓவர்கள் எஞ்சியிருந்தது. ஜடேஜா 90 ரன்களிலும், வாஷிங்டன் சுந்தர் 84 ரன்களிலும் தங்களது சதத்தை நெருங்கிக் கொண்டு இருந்தனர். அப்போது அவர்களிடம் பென் ஸ்டோக்ஸ் பேசினார். ‘ஆட்டத்தை முடித்துக் கொள்ளலாம்’ என ஹேண்ட் ஷேக் கொடுக்க முன்வந்தார். ஆனால், அதை இந்திய வீரர்கள் மறுத்துவிட்டனர்.