கைதானதாக போலி வீடியோவை வெளியிட்ட கவர்ச்சி நடிகை மீது வழக்குப்பதிவு

கைதானதாக போலி வீடியோவை வெளியிட்ட நடிகை ஊர்பி ஜாவேத் மீது 4 பிரிவுகளின் கீழ் மும்பை போலீசார் வழக்குப்பதிவு செய்துள்ளனர். 

பாலிவுட் டெலிவிஷன் தொடர்களில் நடித்து பிரபலமானவர், ஊர்பி ஜாவேத். படவாய்ப்புகள் இல்லாத நிலையில் சமூக வலைதளங்களில் அவ்வப்போது தனது கவர்ச்சிகரமான புகைப்படங்களை வெளியிட்டு வருகிறார்.

குறிப்பாக வாழைத்தோல், பிளாஸ்டிக் டப்பா, சிகரெட் பஞ்சு போன்ற விசித்திரமான பொருட்களை ஆடையாக அணிந்து கவர்ச்சி விருந்து படைத்து கவனம் ஈர்த்து வருகிறார். இதற்காகவே சமூக வலைதளங்களில் இவருக்கு ரசிகர்கள் ஏராளமானோர் இருக்கிறார்கள்.இந்தநிலையில் பொது இடத்தில் ஆபாசமாக உடையணிந்த ஊர்பி ஜாவேத்தை போலீசார் வலுக்கட்டாயமாக கைது செய்து ஜீப்பில் ஏற்றிச் செல்வது போன்ற புகைப்படங்களும், வீடியோவும் வெளியாகி பரபரப்பை ஏற்படுத்தியது.

ஆனால் இந்த வீடியோ உண்மையில்லை என்று தற்போது தெரியவந்துள்ளது. இதையடுத்து ஊர்பி ஜாவேத் மீது உண்மையான போலீசார் வழக்குப்பதிவு செய்துள்ளனர்.சொந்த நோக்கத்துக்காக காவல்துறையின் சின்னத்தையும், சீருடையையும் தவறாக பயன்படுத்தியதாகவும், பொதுமக்களிடம் தவறான சிந்தனையை விதைத்ததற்காகவும் ஊர்பி ஜாவேத் மீது 4 பிரிவுகளின் கீழ் மும்பை போலீசார் வழக்குப்பதிவு செய்துள்ளனர். இது பாலிவுட்டில் பரபரப்பை ஏற்படுத்தியுள்ளது.