உலக மக்கள் தொகை தின விழிப்புணர்வு பேரணி: மாவட்ட வருவாய் அலுவலர் துவக்கி வைத்தார்

1987-ஆம் ஆண்டு உலக மக்கள் தொகை 500 கோடியை தாண்டி விட்டது என்ற அபாய எச்சரிக்கையை மக்களுக்கு உணர்த்தும் வகையில் ஐ.நா.சபை ஆண்டுதோறும் ஜூலை மாதம் 11-ம் நாளை உலக மக்கள் தொகை தினமாக அறிவித்தது. அதன் ஒரு பகுதியாக, பாளையங்கோட்டை வ.உ.சி மைதானத்தில் உலக மக்கள் தொகை தின உறுதிமொழி ஏற்றுதுடன் விழிப்புணர்வு ரதம் மற்றும் செவிலியர் பயிற்சி மாணவிகள் மற்றும் கல்லூரி மாணவிகள் கலந்து கொண்ட விழிப்புணர்வு பேரணி துவக்கி வைக்கப்பட்டது. 

இப்பேரணியில் திருநெல்வேலி அரசு கலை பண்பாட்டுத்துறை கலைஞர்கள் பங்கு கொண்டு சிறப்பித்தனர். பேரணியில் மாணவிகள் குடும்ப நலம் தொடர்பான விழிப்புணர்வு பதாகைகளை ஏந்தி கொண்டு சென்றனர். மேலும், குடும்பநலம் மற்றும் தாய்சேய் நல சேவைகளை தங்கு தடையின்றி வழங்குவதன் அவசியம் குறித்து விழிப்புணர்வு ஏற்படுத்தப்பட்டது.

இந்நிகழ்ச்சியில், மருத்துவக்கல்லூரி, மருத்துவமனை முதல்வர் ரேவதி பாலன், இணை இயக்குநர் (பொ) மருத்துவம் ஊரக நலப்பணிகள் மற்றும் குடும்ப நலம் லதா, மாவட்ட சுகாதார அலுவலர் (பொ) வேல்முருகன் கணேஷ் மற்றும் துணை இயக்குநர்கள் துரை (காசநோய்), அலர்சாந்தி (தொழுநோய்), மாநகர நல அலுவலர் ராணி, மாவட்ட குடும்ப நலத்துறை சார்ந்த மக்கள் கல்வி தகவல் அலுவலர் (பொ) ஜெயசித்ரா, இளநிலை நிர்வாக அலுவலர் கூத்தநயினார் (எ) செந்தில், புள்ளிவிபர உதவியாளர் வேலு உட்பட பலர் கலந்து கொண்டார்கள்.