ஸ்ரீவைகுண்டம் கள்ளபிரான் கோவில் தேரோட்டம்: அச்சுத்தடி உடைந்ததால் பரபரப்பு

ஸ்ரீவைகுண்டம் கள்ளபிரான் கோவில் சித்திரை திருவிழா தேரோட்டத்தின் போது, தேரைத் தள்ளும் தடி (அச்சுத்தடி) திடீரென உடைந்ததால் தேரோட்டம் தற்காலிகமாக நிறுத்தப்பட்டது.

தூத்துக்குடி மாவட்டம், தாமிரபரணி ஆற்றங்கரையில் அமைந்துள்ள ஸ்ரீவைகுண்டம் கள்ளபிரான் கோவில், 108 திவ்ய தேசங்களில் ஒன்றாகவும், நவதிருப்பதி தலங்களில் முதலாவது தலமாகவும் போற்றப்படுகிறது. இக்கோவிலில் ஆண்டுதோறும் சித்திரை திருவிழா வெகு விமரிசையாகக் கொண்டாடப்படுவது வழக்கம். இந்த ஆண்டுக்கான திருவிழா கடந்த வாரம் தொடங்கி நடைபெற்று வருகிறது.

விழாவின் முக்கிய நிகழ்வான 9-ஆம் நாள் தேரோட்டம் இன்று காலை தொடங்கியது. ஏராளமான பக்தர்கள் திரண்டு 'கோவிந்தா' கோஷத்துடன் தேரை வடம் பிடித்து இழுத்தனர். தேர் நிலையை விட்டுப் புறப்பட்டுச் சென்றுகொண்டிருந்தபோது, எதிர்பாராத விதமாக தேரை முட்டித் தள்ளப் பயன்படும் தடி உடைந்தது.

இதனால் அதிர்ச்சியடைந்த பக்தர்கள் தேரோட்டத்தை உடனடியாக நிறுத்தினர். இதனைத் தொடர்ந்து, உடைந்த தடியைச் சீரமைக்கும் பணியில் கோவில் பணியாளர்கள் மற்றும் தச்சர்கள் ஈடுபட்டனர். சீரமைப்புப் பணிகள் காரணமாகச் சுமார் ஒரு மணி நேரத்திற்கும் மேலாகத் தேரோட்டம் தடைபட்டது. இதனால் வெயிலையும் பொருட்படுத்தாமல் பக்தர்கள் நீண்ட நேரம் காத்திருக்க வேண்டிய சூழல் உருவானது. சீரமைப்புப் பணிகள் நிறைவடைந்த பின், மீண்டும் தேரோட்டம் தொடங்கி நடைபெற்றது.