கணவர் தாக்கியதில் ‘பல்செட்’ தொண்டையில் சிக்கி பெண் சாவு

வாசுதேவநல்லூர் அருகே கணவர் தாக்கியதில் ‘பல்செட்’ தொண்டையில் சிக்கி பெண் பரிதாபமாக உயிரிழந்தார். 

தென்காசி மாவட்டம் வாசுதேவநல்லூர் கலைஞர் காலனி பகுதியைச் சேர்ந்தவர் திருமலைச்சாமி (42). கூலித் தொழிலாளியான இவர் தன்னுடைய மாமா மகளான சசிகலாவை (34) திருமணம் செய்து கொண்டார். இவர்களுக்கு பிரித்திஷா (9) என்ற மகள் உள்ளார்.

கணவன்-மனைவி இடையே அடிக்கடி குடும்ப தகராறு ஏற்பட்டது வந்ததாக கூறப்படுகிறது. நேற்று முன்தினம் தீபாவளி பண்டிகையையொட்டி சசிகலாவின் தாயாரான வால்பாறை எஸ்டேட் பகுதியைச் சேர்ந்த பார்வதி, தனது மகளைப் பார்ப்பதற்காக வந்தார்.

மதியம் திருமலைச்சாமிக்கும், சசிகலாவுக்கும் இடையே மீண்டும் தகராறு ஏற்பட்டது. அப்போது ஆத்திரமடைந்த திருமலைச்சாமி, பாத்திரம் கழுவ அமரும் சிறிய மரப்பலகையை எடுத்து மனைவி சசிகலாவின் முகத்தில் தாக்கியதாக கூறப்படுகிறது.

இதில் சசிகலாவின் வாயில் பொருத்தப்பட்டு இருந்த ‘பல்செட்’ கழன்று அவரது தொண்டையில் சிக்கியது. இதில் மயங்கி விழுந்து உயிருக்கு போராடிய அவரை சிகிச்சைக்காக புளியங்குடி அரசு மருத்துவமனைக்கு கொண்டு சென்றனர். அங்கு அவருக்கு முதலுதவி சிகிச்சை அளித்து மேல் சிகிச்சைக்காக பாளையங்கோட்டை ஐகிரவுண்டு அரசு மருத்துவமனைக்கு கொண்டு சென்றனர். ஆனால் செல்லும் வழியிலேயே சசிகலா பரிதாபமாக இறந்தார். அவரது உடல் பிரேத பரிசோதனைக்காக அனுப்பி வைக்கப்பட்டது.

இதுகுறித்து பார்வதி அளித்த புகாரின்பேரில், திருமலைச்சாமி மீது பி.என்.எஸ். 105 (மரணம் ஏற்படுத்தும் எண்ணம் இல்லாமல் உடலில் காயம் ஏற்படுத்துதல்) பிரிவில் வாசுதேவநல்லூர் போலீசார் வழக்குப்பதிவு செய்து கைது செய்தனர். தொடர்ந்து தீவிர விசாரணை நடத்தி வருகிறார்கள். வாசுதேவநல்லூர் அருகே கணவர் தாக்கியதில் ‘பல்செட்’ கழன்று தொண்டையில் சிக்கி பெண் இறந்த சம்பவம் அந்த பகுதியில் சோகத்தை ஏற்படுத்தி உள்ளது.