திறந்தவெளியில் உள்ள மின் ஸ்விட்ச் பாக்ஸ்கள்: உடனடியாகச் சீரமைக்க பொதுமக்கள் கோரிக்கை!

தூத்துக்குடி அன்னை வேளாங்கண்ணி நகர் பகுதியில் திறந்த நிலையில் உள்ள மின் ஸ்விட்ச் பாக்ஸ்களை சீரமைக்க வேண்டும் என்று அப்பகுதி பொதுமக்கள் கோரிக்கை விடுத்துள்ளனர்.

தூத்துக்குடி மாநகராட்சிக்குட்பட்ட 5-வது வார்டு அன்னை வேளாங்கண்ணி நகர் குடியிருப்புப் பகுதியில், சாலையோரம் அமைந்துள்ள மின்கம்பத்தில் உள்ள ஸ்விட்ச் பாக்ஸ்கள் பாதுகாப்பற்ற முறையில் திறந்த நிலையில் ஆபத்தான முறையில் காணப்படுகின்றன. மின்கம்பத்தில் இரண்டு ஸ்விட்ச் பாக்ஸ்கள் அமைக்கப்பட்டுள்ளன. இவை இரண்டுமே கதவுகள் சேதமடைந்தோ அல்லது மூடப்படாமலோ திறந்த நிலையில் உள்ளன.

அதிகளவில் பொதுமக்கள், குழந்தைகள் மற்றும் வாகனங்கள் கடந்து செல்லும் பகுதி என்பதால், எதிர்பாராத விதமாக அசம்பாவிதங்கள் ஏதேனும் ஏற்படுமோ என்ற அச்சத்தில் அப்பகுதி மக்கள் உள்ளனர். எனவே, ஏதேனும் பெரிய விபத்து அல்லது பாதிப்புகள் ஏற்படும் முன், திறந்த நிலையில் இருக்கும் இந்த மின் ஸ்விட்ச் பாக்ஸ்களை உடனடியாக ஆய்வு செய்து, பாதுகாப்பான முறையில் சீரமைத்துத் தருமாறு மாவட்ட நிர்வாகம், மாநகராட்சி மற்றும் மின்சாரவாரிய அதிகாரிகளுக்கு அப்பகுதி பொதுமக்கள் கோரிக்கை விடுத்துள்ளனர்.