வீடு புகுந்து பெண் குளிப்பதை செல்போனில் வீடியோ எடுத்த முன்னாள் ராணுவ வீரர் கைது!

தென்காசி மாவட்டம் செங்கோட்டை அருகே உள்ள தெற்கு மேடு பகுதியைச் சேர்ந்தவர் குமார் (50). முன்னாள் ராணுவ வீரரான இவர் பா.ஜனதா கட்சி பிரமுகராகவும் உள்ளார். நேற்று முன்தினம் குமார் ஒரு வீட்டில் அத்துமீறி நுழைந்ததாக கூறப்படுகிறது. அந்த வீட்டின் குளியலறையில் குளித்துக் கொண்டு இருந்த சுமார் 40 வயதுடைய பெண்ணை தனது செல்போனில் வீடியோ எடுத்ததாக கூறப்படுகிறது.

இதை பார்த்து அதிர்ச்சி அடைந்த அந்த பெண் அலறினார். உடனே, குமார் அங்கிருந்து தப்பிச் சென்றுவிட்டார். மேலும் வீட்டில் அந்த பெண்ணை தவிர யாரும் இல்லை என்று தெரிகிறது. இதுகுறித்து புளியரை போலீஸ் நிலையத்தில் புகார் செய்யப்பட்டது. அதன்பேரில் சப்-இன்ஸ்பெக்டர் சுபாஷ் சந்திரபோஸ் மற்றும் போலீசார் சம்பவ இடத்திற்கு சென்று விசாரணை நடத்தினார்கள். தொடர்ந்து போலீசார் வழக்குப்பதிந்து, குமாரை கைது செய்து தீவிர விசாரணை மேற்கொண்டு வருகிறார்கள்.